សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ រថយន្តពីរគ្រឿងបានបើកបរក្នុងទិសដៅបញ្ច្រាសទិសគ្នា ហើយបានជ្រុលចង្កូតបុកគ្នា ពេញទំហឹងបណ្តាលឲ្យលាន់ឮសូរដូចរន្ទះកាលពីវេលាម៉ោង៩និង១៥នាទីយប់ ថ្ងៃទី១២ ខែកញ្ញា ឆ្នាំ២០១៦ ស្ថិតនៅភូមិលើ សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង ។
ប្រភពរាយការណ៍ថា រថយន្តពាក់ស្លាកលេខ តាកែវ 3A. 6263 ប្រភេទ រថយន្តកូរ៉េមួយតោនកន្លះ ពណ៌ក្រហម ចុះមកពីលើស្ពានទិសដៅពីជើងទៅត្បូង រីឯរថយន្តមួយគ្រឿងទៀតម៉ាក សាំយ៉ុង ពណ៌ស គ្មាន
ស្លាកលេខ ទិសដៅពីត្បូងទៅជើង បើកបរក្នុងល្បឿនលឿន លុះមកដល់ចំណុចផ្លូវបំបែកគល់
ស្ពានសេកុង បើកមិនប្រយ័ត្ន បត់ទាំងបង្ខំមកបុកនឹងរថយន្តមួយគ្រឿងទៀតតែម្តង ។
ក្រោយកើតហេតុ ភាគីទាំងសងខាងបានសម្រួលគ្នា ដោយខាងរថយន្តសាំយ៉ុងបានហៅរថយន្តស្ទូចមកស្ទូចភ្លាមៗ យកទុកនៅផ្ទះម្ចាស់រថយន្តស្ទូចឈ្មោះ វណ្ណា ជាថៅកែអេតចាយ រង់ចាំព្រឹកយកមកជួសជុលតែម្តង ។
ចំណែករថយន្ត១គ្រឿងទៀតត្រូវថៅកែយករថយន្តមួយគ្រឿងទៀតមកអូសយកទៅជួសជុលរៀងខ្លួន ៕ សុផាត
