សង្ស័យម្ចាស់ផ្ទះសំណាក់យីហោលីលីបើកដៃ ទើបជនសង្ស័យធ្វើសកម្មភាពលួចម៉ូតូ១គ្រឿង

ភ្នំពេញ៖ បងប្អូនដែលនាំគ្នាចូលទៅជួលបន្ទប់ស្នាក់នៅផ្ទះសំណាក់យីហោ”លីលី” ត្រូវប្រុងប្រយ័ត្នផង ព្រោះផ្ទះសំណាក់នេះងាយស្រួលឲ្យចោរលួចម៉ូតូណាស់ ជាក់ស្ដែងកាលពីវេលាម៉ោង៤ព្រឹកថ្ងៃទី០៦ ខែតុលា ឆ្នាំ២០១៦ ខណៈក្រុមចោរជំនាញខាងលួចម៉ូតូ២នាក់ ត្រូវបានកម្លាំងនគរបាលប៉ុស្តិ៍ស្រះចកឃាត់ខ្លួនភ្លាមៗក្រោយធ្វើសកម្មភាពម៉ូតូ នៅចំណុចផ្ទះសំណាក់យីហោ(លីលី)លេខ៣៣ ផ្លូវព្រះមុនីវង្ស ភូមិ៧ សង្កាត់ស្រះចក ខណ្ឌដូនពេញ រាជធានីភ្នំពេញ ។

សមត្ថកិច្ចឲ្យដឹងថា ជនសង្ស័យដែលត្រូវឃាត់ខ្លួនទី ១.ឈ្មោះជួប ភក្តី ភេទប្រុស អាយុ១៨ឆ្នាំ ជនជាតិខ្មែរ មុខរបរមិនប្រាកដ មានទីលំនៅ មិនពិតប្រាកដ ទី២.ឈ្មោះ គុជ សុផានិត ភេទប្រុសអាយុ៣៦ឆ្នាំជនជាតិខ្មែរមុខរបរមិនប្រាកដមានទីលំនៅមិនប្រាកដ។ វត្ថុតាងចាប់យកបាន ម៉ូតូមួយគ្រឿង ម៉ាក MSX. ពណ៌ក្រហម បិទស្កុត ពណ៌ខ្មៅ ពាក់ស្លាកលេខ ភ្នំពេញ 1FN2642 ជាម៉ូតូរបស់ជនរងគ្រោះឈ្មោះធូ សុធី ភេទប្រុសអាយុ១៩ឆ្នាំ ជនជាតិខ្មែរ មុខរបរសិស្ស មានទីលំនៅស្នាក់ផ្ទះជួល ផ្លូវលំ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា នៅមុនពេលកើតហេតុ ជនរងគ្រោះ និងមិត្តភក្តិ២នាក់ទៀត បាននាំគ្នាជិះម៉ូតូមកជួលបន្ទប់ដេកនៅផ្ទះសំណាក់យីហោ(លីលី)កន្លែងកើតហេតុ ស្រាប់តែលុះដល់ម៉ោង០៤ទៀបភ្លឺ ថ្ងៃទី៦ ខែតុលា ស្រាប់តែបាត់ម៉ូតូពីកន្លែងផ្ញើ ក៏បែងចែកគ្នាដើររក ស្រាប់តែឃើញក្រុមជនល្មើសកំពុងបណ្តើរម៉ូតូ ក៏ប្តឹងសមត្ថកិច្ចមូលដ្ឋានឲ្យឃាត់ខ្លួនបានទាំង២នាក់តែម្តង ។

បច្ចុប្បន្នជនសង្ស័យទាំង២នាក់ ត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងចាត់ការតាមច្បាប់ ៕ ស ដារ៉ា