សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងនគរបាល នៃអធិការដ្ឋាននគរបាលខណ្ឌទួលគោក ឃាត់ខ្លួនជនសង្ស័យ២នាក់ នៅចំណុចផ្លូវរថភ្លើងក្នុងមូលដ្ឋានសង្កាត់បឹងកក់ទី១ ខណៈដែលជនសង្ស័យ២នាក់នោះជិះម៉ូតូឆ្លងកាត់គោលដៅសមត្ថកិច្ចកំពុងល្បាត ដោយមានការសង្ស័យ កម្លាំងឃាត់ឆែកឆេររកឃើញថ្នាំញៀនជាប់ខ្លួនក៏ចាប់ខ្លួនតែម្តង ។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង ២២ និង៣០នាទីយប់ ថ្ងៃទី១៣ ខែតុលា ឆ្នាំ២០១៦ នៅចំណុចផ្លូវរថភ្លើង ក្រុម៥៤ ភូមិ១៤ សង្កាត់បឹងកក់ទី១ ខណ្ឌទួលគោក ។
តាមប្រភពព័ត៌មានពីសមត្ថកិច្ចខណ្ឌទួលគោក បានឲ្យដឹងថា ជនសង្ស័យទាំង២នាក់នេះទី១ ឈ្មោះខឿន សុភ័ត្ត្រ ភេទ ប្រុស ២១ឆ្នាំ ស្រុកកំណើត ភូមិឫស្សីជុក ឃុំរកា ស្រុកពារាំង ខេត្ត ព្រៃវែង ស្នាក់នៅផ្ទះជួល ផ្លូវលំ សង្កាត់ទួលសង្កែ ខណ្ឌ ឫស្សីកែវ ទី២ ឈ្មោះ រ័ត្ន រៀម ភេទប្រុស អាយុ៣៦ឆ្នាំ ស្នាក់នៅ ផ្ទះជួល ម្តុំម៉ាស៊ីនទឹកស្អាត សង្កាត់ជ្រោយចង្វា ខណ្ឌជ្រោយចង្វា ។ ក្នុងការឃាត់ខ្លួននេះ ប៉ូលិសដកហូតបានថ្នាំញៀន ១កញ្ចប់តូច ។
ប្រភពដដែរល បានបន្តទៀតថា នៅមុនពេលឃាត់ខ្លួន ជនសង្ស័យខាងលើនេះ គឺកម្លាំងបានដាក់គោកដៅល្បាត ដើម្បីពួនស្ទាក់ និងការពារសន្តិសុខ សុវត្ថិភាពជូនប្រជាពលរដ្ឋ ក្នុងមូលដ្ឋាន លុះដល់ម៉ោងកើតហេតុ ស្រាប់តែ ជនសង្ស័យទាំង២នាក់ ជិះម៉ូតូម៉ាក ស្កូបពី ពណ៍ផ្កាឈូក ពាក់ស្លាកលេខ ភ្នំពេញ ១AF ១៤១៦ ដោយមានការសង្ស័យ ទើបឃាត់ខ្លួនដើម្បីត្រួតពិនិត្យ និងឆែកឆេររកឃើញថ្នាំញៀនចំនួន១កញ្ចប់ជាក់ស្តែងផងដែរ ។ បន្ទាប់ពីឃាត់ខ្លួន ជនសង្ស័យទី២ ឈ្មោះ រ័ត្ន រៀម បានឲ្យដឹងថា រូបគេមិនពាក់ព័ន្ធនឹងករណីនេះទេ គឺគ្រាន់តែឌុបជនសង្ស័យ ទី១ឈ្មោះ ខឿន សុភ័ត្ត្រ ទាំងមិនដឹងថា ឈ្មោះខឿន សុភ័ត្ត្រ មានថ្នាំញៀនជាប់ខ្លួននោះទេ ។
បច្ចុប្បន្នជនសង្ស័យទាំងពីរនាក់ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងទៅ តាមនីតិវិធី ៕ ស ដារ៉ា
