ប្រជាពលរដ្ឋប្រាប់ថាសង្វៀនបញ្ជល់មាន់មួយកន្លែងកំពុងដំណើរការក្នុងឃុំឈូកស្រុកក្រូចឆ្មារ

ខេត្តត្បូងឃ្មុំ ៖ ប្រជាពលរដ្ឋបាន ឲ្យដឹងថា សង្វៀនបញ្ជល់មាន់មួយដែល មានទីតាំងក្នុងចម្ការស្វាយចន្ទីមួយកន្លែង ស្ថិតក្នុងភូមិស្រះត្រកួន ឃុំឈូក ស្រុកក្រូច ឆ្មារ ខេត្តត្បូងឃ្មុំ ពេលនេះកំពុងបើកដំណើរ ការយ៉ាងគគ្រឹកគគ្រេង ដោយគ្មានចំណាត់ការពីសមត្ថកិច្ចឡើយ ។

អ្នកភូមិបាននិយាយថា ជារៀងរាល់ថ្ងៃចាប់ពីថ្ងៃព្រហស្បតិ៍ ដល់ថ្ងៃសៅរ៍ គេ ឃើញក្រុមអ្នកលេងមាន់ជល់ដឹកមាន់ តាមម៉ូតូ ឬរថយន្តមកលេងគគ្រឹកគគ្រេង ដោយបង្កសំឡេងហ៊ោកញ្ជៀវ ។ ប្រភព បន្តថា ក្រៅពីបញ្ជល់មាន់ទីតាំងនេះ ក៏មាន បើកលេងល្បែងស៊ីសងផ្សេងៗទៀត មាន ដូចជាបៀ និងអាប៉ោងផងដែរដែលធ្វើឲ្យ អ្នកភូមិមានការព្រួយបារម្ភខ្លាំងអំពីបញ្ហាសន្តិសុខ និងសុវត្ថិភាព ។

លោក សំ ហេង អធិការស្រុកក្រូចឆ្មារ បានថ្លែងទទួលស្គាល់ថា ទីតាំងខាងលើ កន្លងទៅពិតជាមានលេងល្បែង ដូចការ លើកឡើងរបស់ប្រជាពលរដ្ឋមែន ប៉ុន្តែកាលពីពេលថ្មីៗកន្លងទៅនេះត្រូវបានសមត្ថកិច្ចចុះបង្ក្រាបអស់ហើយ ។ បើទោះជាដូច្នេះក្ដី លោកថា បើសិនជានៅតែបន្តលេងទៀត លោកនឹងចាត់ឲ្យកម្លាំងសមត្ថកិច្ចចុះទៅ បង្ក្រាបទៀត ៕ ហេង នរិន្ទ្រ