អាវុធហត្ថឃាត់ខ្លួនជនសង្ស័យម្នាក់ករណី លក់ និងប្រើប្រាស់ថ្នាំញៀន

ខេត្តរតនគិរី៖ ជនសង្ស័យម្នាក់ត្រូវបានអាវុធហត្ថក្រុងបានលុងឃាត់ខ្លួនក្នុង ករណីរក្សាទុក ចែកចាយ និងប្រើប្រាស់ថ្នាំញៀនដែលករណីឃាត់ខ្លួនជនសង្ស័យ ខាងលើនេះធ្វើឡើងនៅវេលាម៉ោង១១ថ្ងៃត្រង់ ថ្ងៃទី៨ ខែធ្នូ ឆ្នាំ២០១៦ នៅផ្ទះ សំណាក់ពន្លឺពេជ្រ ស្ថិតក្នុងភូមិថ្មី សង្កាត់ ឡាបានសៀក ក្រុងបានលុង ខេត្ត រតនគិរី។ លោកវរសេនីយ៍ត្រី ហៃ វណ្ណារ៉ា មេបញ្ជាការកងរាជអាវុធហត្ថក្រុងបានលុង ដោយមានការសម្របសម្រួលពី លោក លាវ ស្រេង ព្រះរាជអាជ្ញាអមសាលាដំបូងខេត្តរតនគិរីបានបានឃាត់ខ្លួន ជនសង្ស័យម្នាក់ឈ្មោះ ហ៊ុន វណ្ណៈ ភេទ ប្រុស អាយុ១៦ឆ្នាំ ជនជាតិខ្មែរ មុខរបរមិន ពិតប្រាកដ មានទីលំនៅ ភូមិថ្មី សង្កាត់ឡា បានសៀក ក្រុងបានលុង ខេត្តរតនគិរី។

លោកបានបន្តទៀតថា ការបង្ក្រាប ករណីចែកចាយ និងប្រើប្រាស់ថ្នាំញៀន នេះ សមត្ថកិច្ចដកហូតបានម្សៅក្រាម ពណ៌សថ្លា (ម៉ាទឹកកកមួយកញ្ចប់ធំទម្ងន់ ៣.៤៥ក្រាម) ទូរស័ព្ទដៃម៉ាកIphone4 ពណ៌ខ្មៅ១គ្រឿង ម៉ូតូវ៉េវពណ៌ខ្មៅលាយ ក្រហម ពាក់ស្លាកលេខ រតនគិរី1B-3283 ១គ្រឿង ព្រមទាំងសម្ភារៈវេចខ្ចប់ និង ប្រដាប់ជក់ថ្នាំញៀនមួយចំនួន។

បច្ចុប្បន្នជនសង្ស័យខាងលើត្រូវបាន មន្រ្តីការិយាល័យប្រឆាំងគ្រឿងញៀននៃ បញ្ជាការកងរាជអាវុធហត្ថខេត្តរតនគិរី បំពេញសំណុំរឿងបញ្ជូនទៅសាលាដំបូងខេត្តចាត់ការតាមច្បាប់៕ វុទ្ធឦសាន