សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវបានប្រជាពលរដ្ឋជាជនរងគ្រោះចាប់ខ្លួនយកមកប្រគល់ឲ្យសមត្ថកិច្ចនគរបាលប៉ុស្តិ៍ទឹកថ្លាក្រោយពីរូបគេបានធ្វើសកម្មភាពលួចយកទូរស័ព្ទដៃមួយគ្រឿងម៉ាកអាយហ្វូនហ្វាយដែលម្ចាស់កំពុងសាកបញ្ចូលថ្មយកទៅទៅបញ្ចាំព្រោះតែគ្មានលុយសងមិត្តភក្តិចំនួន៥០០០រៀល។
ករណីនេះកើតឡើងកាលពីវេលាម៉ោង ១រសៀលថ្ងៃទី១៣ ខែធ្នូ ឆ្នាំ២០១៦ នៅ បន្ទប់ជួលក្នុងសង្កាត់ទឹកល្អក់១ ខណ្ឌទួល គោក ហើយក៏នាំខ្លួនជនសង្ស័យយកមកកាន់ប៉ុស្តិ៍ទឹកថ្លា ខណ្ឌសែនសុខដើម្បីឲ្យ សមត្ថកិច្ចជំនាញធ្វើការសាកសួរ។
សមត្ថកិច្ចបានឲ្យដឹងថាជនសង្ស័យមានឈ្មោះ អេង រ័ត្នរ៉ាមូ ភេទប្រុស អាយុ២៤ ឆ្នាំមុខរបរមិនពិតប្រាកដ ស្នាក់នៅផ្ទះជួល តាមផ្លូវលំ ក្នុងសង្កាត់បឹងកក់១ ខណ្ឌទួល គោក។ ចំណែកជនរងគ្រោះមានឈ្មោះ អាន សែន ភេទប្រុស អាយុ២៣ឆ្នាំ មុខរបរ នៅផ្ទះគ្មានលេខ ផ្លូវលំ ក្រុម១១ ភូមិ ត្រពាំងឈូក សង្កាត់ទឹកថ្លា ខណ្ឌសែន សុខ។
ប្រភពពីដើមបណ្តឹងបានឲ្យដឹងថាជនសង្ស័យគឺជាអ្នកស្គាល់គ្នាជាមួយនឹងរូប គាត់ហើយបានស្នាក់នៅក្នុងផ្ទះ៤ទៅ៥ថ្ងៃហើយ លុះមកដល់ថ្ងៃទី១២ ខែធ្នូ ឆ្នាំ២០១៦វេលាម៉ោងប្រហែលជា៥និង៣០នាទី រូបគាត់បានទុកទូរស័ព្ទដៃ១គ្រឿងម៉ាក អាយហ្វូនហ្វាយពណ៌សនៅក្នុងផ្ទះបញ្ចូលថ្មដាក់នៅលើតុ។
ពេលដែលជនសង្ស័យឃើញក៏លួចយកទៅបញ្ចាំនិងរត់គេចខ្លួនទៅស្នាក់នៅជាមួយមិត្តភក្តិក្នុងសង្កាត់ទឹកល្អក់១ ខណ្ឌទួលគោក។ លុះមកដល់ថ្ងៃទី ១៣ខែឆ្នាំដដែលវេលាម៉ោង១រសៀល ទើបគាត់ដើរកឃើញនៅចំណុចខាងលើក៏ ឃាត់ខ្លួនយកមកប្រគល់ឲ្យសមត្ថកិច្ចនគរបាលប៉ុស្តិ៍ទឹកថ្លាតែម្តង។
តាមចម្លើយសារភាពរបស់ជនសង្ស័យបានឆ្លើយប្រាប់សមត្ថកិច្ចថារូបគេពិតជាបានលួចយកទូរស័ព្ទដៃជនរងគ្រោះខាងលើប្រាកដមែនហើយយកទៅបញ្ចាំបានលុយចំនួន៥០ដុល្លារ។ជនសង្ស័យបន្តទៀតថាដោយសារតែរូបគេជំពាក់លុយមិត្តភក្តិចំនួន៥០០០រៀលហើយគេទារឲ្យសង វិញចំនួន៥០.០០០រៀលហើយព្រោះតែ ខ្លួនគ្មានលុយសងគេទើបសម្រេចចិត្តលួចទូរស័ព្ទរបស់ជនរងគ្រោះយកទៅបញ្ចាំតែម្តង។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខដើម្បីចាត់ការតាមផ្លូវច្បាប់៕ តុង សីហា
