ម៉ូតូ២គ្រឿងបុកគ្នារបួសធ្ងន់៣នាក់

ខេត្តកំពង់ស្ពឺ៖ យុវជន៣នាក់រងរបួស ធ្ងន់ដោយសារបើកម៉ូតូបុកគ្នាពេញទំហឹងនៅលើផ្លូវលំចំណុចភូមិកាកាប ឃុំក្សេម ក្សាន្ត ស្រុកឧដុង្គ ខេត្តកំពង់ស្ពឺកាលពីយប់ ថ្ងៃទី១៣ ខែធ្នូ ឆ្នាំ២០១៦។

មន្ត្រីនគរបាលចរាចរស្រុកឧដុង្គបានឲ្យដឹងថា នៅមុនពេលកើតហេតុគេឃើញ យុវជន២នាក់ជិះម៉ូតូមួយគ្រឿងម៉ាកហុងដាសេ១២៥ស៊េរីឆ្នាំ២០១១ ពណ៌ខ្មៅពាក់ ស្លាកលេខភ្នំពេញ1BG-9135 បើកបរដោយឈ្មោះ ពុធ ភារម្យ ភេទប្រុស អាយុ ១៨ឆ្នាំ រស់នៅភូមិក្រាំងត្រប ឃុំត្រាចទង ស្រុកឧដុង្គ និងអ្នករួមដំណើរឈ្មោះ ស្រន់ វុទ្ធ ភេទប្រុស អាយុ២១ឆ្នាំ រស់នៅភូមិ ឃុំ ជាមួយគ្នា ធ្វើដំណើរពីកើតទៅលិច។

លុះ មកដល់ចំណុចខាងលើបានទៅបុកម៉ូតូមួយគ្រឿងម៉ាកហុងដាសេ90ពណ៌ទឹកប៊ិចពាក់ស្លាកលេខកំពង់ស្ពឺ1E-7086 បើកបរដោយ ឈ្មោះ វ៉ាត់ ប៊ុនហាក់ ភេទប្រុស អាយុ២៧ ឆ្នាំ រស់នៅភូមិបាត់ដឹង ឃុំក្សេមក្សាន្ត ស្រុក ឧដុង្គ ខណៈធ្វើដំណើរក្នុងទិសដៅពីលិចទៅកើតបណ្តាលឲ្យអ្នកទាំង៣ របួសធ្ងន់ត្រូវបាននគរបាលស្រុកឧដុង្គហៅរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺតែម្តង។

ចំណែកម៉ូតូទាំង២ គ្រឿងសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកឧដុង្គរង់ចាំដោះស្រាយជាក្រោយ។ នគរបាលសន្និដ្ឋានថា ករណី នេះដោយសារជនរងគ្រោះទាំងសងខាង បើកលឿន៕ សហការី