សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅព្រឹកថ្ងៃទី១៧ ខែធ្នូ ឆ្នាំ២០១៦នេះ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជ ធានីភ្នំពេញ ដោយមានការចូលរួមពីលោកអភិបាលរងខណ្ឌសែនសុខ និងខណ្ឌមានជ័យផងបានចុះពិនិត្យ រុះរើរបងផ្ទះ និងផ្ទះ១កន្លែង ដែលបានសាងសង់កាត់ទទឹងប្រឡាយ និងបិទផ្លូវទឹកប្រឡាយស្ទឹងមានជ័យ ។
លោក សាំ ពិសិដ្ឋ មានប្រសាសន៍ថាការសង់កាត់ទទឹងប្រឡាយបិទផ្លូវទឹកនេះ បណ្តាលឲ្យតំបន់ទឹកថ្លា ត្រង់ផ្លូវលេខ២០០៤ ផ្លូវណ័រប្រីត តំបន់ខាងត្បូងព្រលានយន្តហោះអន្តរជាតិភ្នំពេញ រងការលិចលង់ធ្ងន់ធ្ងរ កាលមានភ្លៀងធ្លាក់កាលពីប៉ុន្មានថ្ងៃមកនេះ ។ ជាមួយគ្នានេះ គ្រឿងចក្រកំពុងចុះកាយភក់ ស្មៅ តាមទីតាំងដែលអាចជីកបាន ដើម្បីបង្ហូរផ្លូវទឹកសិន។
ប្រឡាយស្ទឹងមានជ័យប្រវែង១៧០០ម៉ែត្រ ទទឹង៣០ម៉ែត្រទៅ៨០ម៉ែត្រ ត្រូវបានប្រជាពលរដ្ឋ ជាង ១០០០គ្រួសារ បាននិងកំពុងសាងសង់លំនៅដ្ឋានរស់នៅពីលើពោះប្រឡាយមួយនេះ ។ ដូច្នេះបញ្ហានេះបានប្រឈមទៅនឹងការបិទផ្លូវទឹកហូរបណ្តាលឲ្យទឹកជន់លិចនៅផ្នែកខាងលើ យ៉ាងខ្លាំង ៕ ប្រាថ្នា
