បើកលឿន ដល់ផ្លូវកោងជ្រុលបុកបង្គោលសញ្ញាចរាចរណ៍ ស្លាប់ និងរងរបួស៣នាក់​ ​

ខេត្តបាត់ដំបង ៖ នារីម្នាក់បានបាត់បង់ជីវិត រីឯ២នាក់ទៀតរងរបួសធ្ងន់ បន្ទាប់ពីបើកម៉ូតូទៅបុកបង្គោលចរាចរណ៍។

ហេតុការណ៍បានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី១៧ ខែធ្នូ ឆ្នាំ២០១៦នៅតាមផ្លូវជាតិលេខ៥ ត្រង់ចំណុចភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង ។

ប្រភពពីមន្ត្រីអាវុធហត្ថបានប្រាប់ថា ជនរងគ្រោះស្លាប់ឈ្មោះសុជាតិ ភេទស្រី អាយុ១៨ឆ្នាំ រីឯ២នាក់ទៀតដែលរងរបួសធ្ងន់ ម្នាក់ឈ្មោះកែវ ពេជ្រ ស្រី អាយុ១៨ឆ្នាំ និងម្នាក់ទៀតឈ្មោះឃិន ភេទប្រុស អាយុ២០ឆ្នាំ ពួកគេនៅភូមិសាំងរាំង ឃុំបវេល ស្រុកបវេល ជិះម៉ូតូម៉ាកឃ្លីន ពណ៌.ស ពាក់ស្លាកលេខបាត់ដំបង1P-1698 ។

ប្រភពបន្តថា មុនពេលកើតហេតុ ជនរងគ្រោះទាំង៣នាក់ ជិះម៉ូតូឌុបគ្នាពីទិសខាងជើងទៅត្បូង ក្នុងល្បឿនលឿន លុះដល់ចំណុចផ្លូវកោងបត់ឆ្វេងបួងបង្កូតមិនទាន់ ក៏ជ្រុលទៅបុកបង្គោលសញ្ញាចរាចរណ៍នៅតាមដងផ្លូវ បណ្ដាលឲ្យដូលបោកក្បាលស្លាប់ និងរងរបួសភ្លាមៗ ៕