សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ យុវជនម្នាក់ត្រូវបានកម្លាំងជំនាញប្រឆាំងគ្រឿងញៀន នៃកងរាជអាវុធហត្ថកំពង់ចាមឃាត់ខ្លួនក្នុងបទជាប់ រក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន។
ការឃាត់ខ្លួននេះ នៅវេលាម៉ោង ៧និង៣០នាទីយប់ ថ្ងៃទី១៩ ខែធ្នូ ឆ្នាំ២០១៦ ក្នុងពេលកម្លាំងកងរាជអាវុធហត្ថខេត្តកំពង់ចាម ចុះល្បាតក្នុងភូមិសាស្ត្រក្រុងកំពង់ចាម នៅចំណុចរង្វង់មូលសេះពីរ(ទន្លេអុំ) ស្ថិតនៅភូមិបឹងស្នាយ សង្កាត់ សំបួរមាស ក្រុងកំពង់ចាម ខេត្តកំពង់ចាម ។
លោកអនុសេនីយឯក សែម ឃាង ប្រធានមន្ទីរយុត្តិធម៌ កងរាជអាវុធហត្ថខេត្តកំពង់ចាមបានឲ្យដឹងថា ជនសង្ស័យឈ្មោះ រស់ ថៃ ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅ ភូមិបឹងកុកទី២ សង្កាត់បឹងកុក ក្រុងកំពងចាម ខេត្តកំពង់ចាម ។
លោកបន្តថា ជនសង្ស័យ ដែលជាមុខសញ្ញាចាស់ធ្លាប់ប្រព្រិត្តសកម្មភាពជួញដូរគ្រឿងញៀនយ៉ាងសកម្មកន្លងមកហើយ កំពុងចុះពីលើរថយន្តឈ្នួល(ម៉ាកសាំយ៉ុង) មកពីភ្នំពេញ ដោយមានការសង្ស័យ កម្លាំងជំនាញបានហៅមកសាកសួរ ហើយឆែកឆេរលើខ្លួនប្រាណរបស់ជនសង្ស័យ រកឃើញម្សៅក្រាមពណ៌សថ្លា ចំនួន៥ កញ្ចប់តូចដែលជនសង្ស័យលាក់ទុកនៅក្នុងហោប៉ៅខោ យកមកពីភ្នំពេញ។
បច្ចុប្បន្នជនសង្ស័យរួមនឹងវត្ថុតាងកំពុងត្រូវបានចងក្រងសំណុំរឿងបញ្ជូនទៅសាលាដំបូងចាត់ការតាមនីតិវិធី ៕ វណ្ណះ
