ជិះម៉ូតូលឿនជ្រុលបុករថយន្តតាក់ស៊ីរងរបួសធ្ងន់

ភ្នំពេញ: បុរសម្នាក់បានរងរបួសធ្ងន់ ខណ:ដែលជិះម៉ូតូ ហុងដាឌ្រីមសេ១២៥ មួយគ្រឿង ទៅបុករថយន្ដតាក់ស៊ីដែលព្យាយាមបត់ឆ្វេងបណ្តាលឲ្យដួល កាលពីវេលាម៉ោង ១១និង២០នាទីយប់ ថ្ងៃទី១៩ ខែកុម្ភ: ឆ្នាំ២០១៧ នៅត្រង់ចំណុចស្ពាននាគវត្តភ្នំ តាមបណ្ដោយផ្លូវ ព្រះនរោត្ដម កែងនឹងផ្លូវ លេខ១០៨ សង្កាត់វត្តភ្នំ ខណ្ឌដូនពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញ បុរសម្នាក់ជិះម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ កំពង់ចាម 1E-1651 ធ្វើដំណើរតាមបណ្ដោយផ្លូវព្រះនរោត្ដម ក្នុងទិសដៅពីត្បូងទៅជើង។ លុះជិះមកដល់ចំណុចកើតហេតុខាងលើដែលជាផ្លូវបែកជា៤ ម៉ូតូនេះក៏បានបុករថយន្ដតាក់ស៊ីមួយគ្រឿង ពណ៌ស ពាក់ស្លាកលេខ ភ្នំពេញ1AM-1480 ធ្វើដំណើរតាមបណ្ដោយផ្លូវ ព្រះនរោត្តម ក្នុងទិសដៅពីជើងទៅត្បូង ពេលកំពុងបត់ឆ្វេងទៅផ្លូវ១០៨ បណ្ដាលឲ្យភាគីបុរសដែលជិះម៉ូតូ ហោះបោកនឹងរថយន្ត ទៅនឹងថ្នល់រងរបួសធ្ងន់តែម្តង ។

ក្រោយពីកើតហេតុជនរងគ្រោះ ត្រូវបានសមត្ថកិចមូលដ្ឋានទូរស័ព្ទហៅរថយន្ដសាមុយបញ្ជូនទៅមន្ទីរពេទ្យ។ចំណែកម៉ូតូនិងរថយន្ដ ត្រូវសមត្ថកិច្ច ធ្វើការវាស់វែង និងយកទៅរក្សាទុកនៅ ការិយាល័យនគរបាលចរាចរណ៍ផ្លូវគោករាជធានីដើម្បីរង់ចាំដោះស្រាយទៅតាមផ្លូវច្បាប់ពេលក្រោយ៕ ប្រាថ្នា