សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ យ៉ាងតិចមនុស្សរងរបួសធ្ងន់៤នាក់ ក្នុងគ្រោះថ្នាក់ចរាចរណ៍រវាងរថយន្ដឡិចស៊ីស RX300 បើកគេចម៉ូតូ ជ្រុលចង្កូតហោះធ្លាក់ប្រឡាយទឹក ខូចខាតរថយន្ដ ស្ទើរតែទាំងស្រុង ។
ហេតុការណ៍នេះបានកើតឡើងនៅវេលាម៉ោង៧ព្រឹក ថ្ងៃទី២៥ ខែកុម្ភៈ ឆ្នាំ២០១៧ តាមបណ្តោយផ្លូវជាតិលេខ៦ ក្នុងភូមិប្រដិត ឃុំសំព្រោច ស្រុកស្ទោង ខេត្តកំពង់ធំ។
តាមប្រភពព័ត៌មានពីសមត្ថកកិច្ចបានឲ្យដឹងថា នៅមុនពេលកើតហេតុ គេឃើញរថយន្តលុចស៊ីសពណ៌ស ពាក់ស្លាកលេខ ភ្នំពេញ 2AM-9608 បើកបរក្នុងល្បឿនលឿន ដឹកភ្ញៀវជនជាតិចិនមកពីភ្នំពេញទៅខេត្តសៀមរាប លុះមកដល់ចំណុចកើតហេតុខាងលើ ក៏មានម៉ូតូ១គ្រឿងជិះឆ្លងថ្នល់ ដែលជាហេតុ នាំឲ្យអ្នកបើកបររថយន្តគេចធ្លាក់ថ្នល់ទៅខាងឆ្វេងដៃរបស់ខ្លួន ក្នុងល្បឿនលឿនរថយន្តបានហោះឆ្លងកាត់ប្រឡាយទឹកដែលមានទទឹងប្រហែល៥ម៉ែត្រទៅធ្លាក់នៅម្ខាងប្រឡាយ បណ្តាលឲ្យអ្នកជិះនៅក្នុងរថយន្តរងរបួសធ្ងន់ទាំង៤នាក់ ក្នុងនោះខ្មែរម្នាក់ ជាអ្នកបើកបរ ឈ្មោះ ម៉ុក អង្គារស្មី ភេទប្រុស អាយុ៣២ឆ្នាំ រស់នៅភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ បាក់ជើង និងជនជាតិចិន៣នាក់ទៀត រងរបួសធ្ងន់ដូនគ្នា និងមានម្នាក់បាក់ជើង ត្រូវបានដឹកទៅសង្គ្រោះនៅមន្ទីរពេទ្យ ចំណែករថយន្ដខូចខាតស្ទើរទាំងស្រុង ៕ ប៊ុន រិទ្ធី
