សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ កាលពីវេលាម៉ោង២៣ និង១៥នាទី ថ្ងៃទី២ ខែមីនា ឆ្នាំ២០១៧ កម្លាំងការិយាល័យប្រឆាំងបទល្មើសគ្រឿង ញៀន បានសហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ជ្រាវ និងកម្លាំងប្រជាការពារភូមិ បានចុះបង្ក្រាបករណីរក្សាទុក ដឹកជញ្ជូន និងជួញដូរសារធាតុញៀននៅចំណុចភូមិវាល សង្កាត់ជ្រាវ ក្រុងសៀមរាប ខេត្តសៀមរាប ដោយឃាត់ខ្លួនជនសង្ស័យប្រុស ស្រី៣នាក់។
សមត្ថកិច្ចឲ្យដឹងថា ជនសង្ស័យ ឈ្មោះ ស៊ិន ស្រីម៉ៅ ភេទស្រី អាយុ១៧ឆ្នាំ មុខរបរគ្មាន ទីលំនៅភូមិវាល សង្កាត់ជ្រាវ ក្រុងខេត្ត សៀមរាប ជាអ្នករក្សាទុក និងដឹកជញ្ជូន និងជួញដូរ, ឈ្មោះ សុខ រតនៈ ភេទប្រុស អាយុ៣០ឆ្នាំ មុខរបរគ្មាន ទីលំនៅភូមិវាល សង្កាត់គោកចក ក្រុង ខេត្តសៀមរាប ជាអ្នករក្សាទុក ដឹកជញ្ជូន និងជួញដូរ និងឈ្មោះ ឃ្លោក សុធារ៉ា ហៅម៉ាប់ ភេទប្រុស អាយុ២៣ឆ្នាំ មុខរបរជាងកាត់ដេរ ទីលំនៅភូមិត្រពាំងសេះ សង្កាត់គោកចក ក្រុង ខេត្តសៀមរាប ខេត្តសៀមរាប ជាអ្នកចាត់ចែង ។ ទាំង៣នាក់នេះសុទ្ធតែមានសារធាតុញៀនក្នុងខ្លួនទាំងអស់គ្នា ។
ជាមួយនេះផងដែរ សមត្ថកិច្ចបានដកហូត ម្សៅមេតំហ្វេតាមីន ប្រភេទទឹកកក ចំនួន៣កញ្ចប់ធំ ស្មើទំងន់៨០.៣ក្រាម, ជញ្ជីងថ្លឹងថ្នាំញៀន១គ្រឿង , ឧបករណ៍ប្រើប្រាស់ និងសំភារៈវេចខ្ចប់ថ្នាំញៀនមួយចំនួន , ទូរស័ព្ទដៃ៤គ្រឿង, ម៉ូតូម៉ាករីបែល ពណ៌ខ្មៅ១គ្រឿង និងដាវ១ដើមផងដែរ ។
ក្រោយឃាត់ខ្លួន ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងថ្ងៃទី៤ ខែមីនា ឆ្នាំ២០១៧ ដើម្បីផ្តន្ទាទោសតាមនីតិវិធី ៕ ប៊ុន រិទ្ធី
