សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានរងរបួស ខណៈដែលជិះម៉ូតូលើកំណាត់ផ្លូវជាតិលេខ១ ហើយបានបត់ឆ្វេងមិនមើលក្រោយ ក៏ត្រូវរថយន្តសាំយ៉ុង១២កៅអី មកពីក្រោយចាប់ហ្វ្រាំងមិនទាន់ ក៏កៀរ និងគេចបណ្ដាលឲ្យធ្លាក់ស្រះហាវថ្នល់ ដែលមានកម្ពស់ជិត៥ម៉ែត្រ សំណាងអ្នកបើក និងអ្នករួមដំណើរមិនគ្រោះថ្នាក់ដល់ជីវិត ។
ហេតុការណ៍នេះបានកើតឡើងកាលពីវេលាម៉ោង១និង១៥នាទីរសៀល ថ្ងៃទី១៥ ខែមីនា ឆ្នាំ២០១៧ ស្ថិតក្នុងភូមិសាលា ស្រុកចាស់ សង្កាត់ព្រៃឆ្លាក់ ក្រុងស្វាយរៀង ។
តាមសក្សីបានឲ្យដឹងថា មុនកើតហេតុគេឃើញបុរសម្នាក់មិនស្គាល់ឈ្មោះបានធ្វើដំណើរដោយម៉ូតូមួយគ្រឿង ម៉ាកហុដា សេ១២៥ ពណ៌ខ្មៅ ពាក់ស្លាកលេខ ស្វាយរៀង ១G៤៥៥៥ លើកំណាត់ផ្លូវជាតិលេខ១ ក្នុងទិសដៅពីកើតមកលិច លុះមកដល់ផ្លូវបំបែកជា៣ ក៏បានបត់ឆ្វេងខ្វះការប្រុងប្រយ័ត្ន មិនមើលក្រោយ ស្រាប់តែមានរថយន្តម៉ាកសាំយ៉ុង ពណ៌ខៀវ ពាក់ស្លាកលេខ ភ្នំពេញ ២P១៤៤៧ បើកបរដោយបុរសម្នាក់ឈ្មោះ ខៅ សៅ អាយុ៣៤ឆ្នាំ និងអ្នករួមដំណើរម្នាក់ត្រូវជាឪពុកមិនស្គាល់ឈ្មោះ ដោយមានទីលំនៅភូមិព្រែកខ្សាយខ ឃុំព្រែកខ្សាយខ ស្រុកពាមរក៍ ខេត្តព្រៃវែង ដែលបើកមកពីក្រោយពីកើតមកលិច ចាប់ហ្វ្រាំងមិនទាន់ ក៏ក្រៀងម៉ូតូ និងបើកគេចបណ្ដាលឲ្យធ្លាក់ស្រះហាលថ្នល់ ដែលមានកម្ពស់ជិត៥ម៉ែត្រយ៉ាងពេញទំហឹងបណ្ដាលឲ្យខូចខាតផ្នែកខាងមុខរថយន្តទាំងស្រុង ។
ក្រោយមកអ្នកធ្វើដំណើរ ក៏ដូចជាអ្នកភូមិចោមរោមមើល និងរាយការណ៍មកសមត្ថកិច្ចយកបុរសអ្នកបើកម៉ូតូទៅកាន់មន្ទីរពេទ្យបង្អែកខេត្តស្វាយរៀង រីឯអ្នកបើករថយន្ត និងអ្នករួមដំណើរបានចេញពីក្នុងរថយន្តមិនមានគ្រោះថ្នាក់អ្វីនោះទេ ។
បន្ទាប់មកសមត្ថកិច្ចនគរបាលបានវាស់វែងព្រមទាំងស្ទូចយករថយន្តមកកាន់អធិការដ្ឋាននគរបាលក្រុងចាត់ការបន្តតាមច្បាប់ ៕ យឹម សុថាន
