គេចពីរថយន្តដូចគ្នាជ្រុលទៅបុកនឹងម៉ូតូស្លាប់ម្នាក់ របួសធ្ងន់ម្នាក់

ខេត្តតាកែវ៖ ស្ត្រីម្នាក់បានស្លាប់ភ្លាមៗនៅនឹងកន្លែងកើតហេតុ បន្ទាប់ពីត្រូវបានរថយន្តដែលបើកបរពីទិសដៅបញ្រ្ចាសគ្នាបុកពេញទំហឹង ។

ហេតុការណ៍នេះកើតឡើងនៅថ្ងៃទី២៨ ខែមីនា ឆ្នាំ២០១៧ វេលាម៉ោង ១៧និង៥០នាទី ស្ថិតនៅលើផ្លូវជាតិលេខ ៣ ចន្លោះគីឡូម៉ែត្រលេខ៤៣ លេខ៤៤ ក្នុងភូមិត្រាំខ្នារ ឃុំសូភី ស្រុកបាទី ខេត្តតាកែវ ។

យោងតាមរបាយការណ៍របស់អធិការដ្ឋាននគបាលស្រុកបាទី បានឲ្យដឹងថា គ្រោះថ្នាក់ចរាចរណ៍នេះកើតឡើងរវាងរថយន្ត និងរថយន្ត នឹងម៉ូតូ ដែលមុនពេលកើតហេតុ គេឃើញមានរថយន្តមួយគ្រឿងម៉ាក ហ៊្វុយហ្ស៊ោ ពណ៌ខៀវ ពាក់ស្លាកលេខ តាកែវ 3A-1127 បើកបរពីទិសខាងត្បូង ទៅជើង ដោយឈ្មោះ ប៉ាន វណ្ណៈ ភេទប្រុស អាយុ ៣២ ឆ្នាំ រស់នៅភូមិកំពង់ជ្រៃ ឃុំស្មោង ស្រុកត្រាំង ខេត្តតាកែវ បានបើកគេចជាមួយនឹងរថយន្តមួយគ្រឿងទៀត ម៉ាក នីសាន់ ពណ៌សលាយខៀវ ពាក់ស្លាកលេខ KPS-0534 ចង្កូតស្តាំបើកបរដោយ ឈ្មោះ ពេជ្រ ភារៈ ភេទប្រុស អាយុ២៣ ឆ្នាំ រស់នៅភូមិ ស្នួល ឃុំជង្រុក ស្រុក គងពិសី ខេត្តកំពង់ស្ពឺ ដែលបានបើកឆ្លងផ្លូវជាតិ ៣ ពីទិសខាងលិច ទៅកើត រួចក៏ជ្រុលទៅបុកម៉ូតូមួយគ្រឿងម៉ាក ស្មាស់រ៉េវ៉ូ ពណ៌ខ្មៅពាក់ស្លាកលេខ តាកែវ 1J-7412 បើកបរពីជើងទៅត្បូង ដោយឈ្មោះ ម៉ី យុទ្ធា ភេទប្រុស អាយុ ២៧ ឆ្នាំ រស់នៅភូមិ តាសួន ឃុំត្រពាំងធំខាងជើង ស្រុកត្រាំកក់ ខេត្តតាកែវ ដែលបណ្តាលឲ្យរបួសធ្ងន់ និងអ្នករួមដំណើរជាមួយឈ្មោះ ហ៊ិន ប៊ុនឡា ភេទស្រី អាយុ ២៧ ឆ្នាំ រស់នៅភូមិត្រពាំងក្រញូង ឃុំត្រពាំងក្រញូង ស្រុកត្រាំកក់ ខេត្តតាកែវ បានស្លាប់នៅនឹងកន្លែងកើតហេតុ ។

បន្ទាប់មករថយន្តបង្កហេតុបានហួសទៅបុក នឹងម៉ូតូមួយគ្រឿងទៀតម៉ាកសង់កូរ៉េ ពណ៌ក្រហម ពាក់ស្លាកលេខ តាកែវ1C-6377 បើកបរមកទីទិសខាងជើងដោយឈ្មោះ ង៉ូវ បូរិន ភេទប្រុស អាយុ ២៨ឆ្នាំ រស់នៅភូមិត្រពាំងមាន ឃុំស្នំក្រពើ ស្រុកគងពិសី ខេត្តកំពង់ស្ពឺ ដោយមិនមានរបួសនោះទេ ។

បច្ចុប្បន្នសពស្រ្តីរងគ្រោះត្រូវបានក្រុមគ្រួសារយកទៅរៀបចំធ្វើបុណ្យតាមប្រពៃណី រីឯវត្ថុតាងទាំង៤ គ្រឿង កម្លាំងជំនាញបានដកហូតមករក្សាទុកនៅអធិការដ្ឋាននគបាលស្រុកបាទី ដើម្បីបំពេញបែបបទបន្ត ៕ ភ្នំដា