សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ពិតជាហួសចិត្តមែន រយៈពេលប៉ុន្មានម៉ោងសោះ មានជនរងគ្រោះចំនួនបីនាក់ បានរត់មកដាក់ពាក្យបណ្តឹងឲ្យនគរបាលប៉ុស្តិ៍ភ្នំពេញថ្មី ជួយអន្តរាគមន៍ករណីចោរលួចកាច់សោកម៉ូតូរបស់ពួកគាត់ ។
ករណីទី១ កើតឡើងនៅវេលម៉ោង៨និង២០ព្រឹក ថ្ងៃទី៣០ ខែមីនា ឆ្នាំ២០១៧ នៅចំណុចផ្លូវឧញ្ញ៉ា ម៉ុងរិទ្ធី ភូមិបាយាប សង្កាត់ភ្នំពេថ្មី ។ ម្ចាស់ម៉ូតូមានឈ្មោះ សាន្ត មករា ភេទប្រុស អាយុ២៦ឆ្នាំ មុខរបរធ្វើសំណង់ក្នុងការដ្ឋានបុរីជិបម៉ុងឡែន និងមានស្រុកកំណើតភូមិអន្លង់ទ្រា ឃុំព្រែកជ្រៃ ស្រុកពង់លាវ ខេត្តព្រៃវែង បានបាត់ម៉ូតូ១គ្រឿង ម៉ាក ហុងដា សេ ១២៥សេរី ឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1CG.0919 ដែលម្ចាស់ចូលទៅអង្កុយផឹកកាហ្វេពេលចេញមកវិញ ក៏បាត់តែម្តង។
ករណីទី២ កើតឡើងនៅម៉ោង៦និង០០នាទីព្រឹក ថ្ងៃទី៣០ ខែមីនា ឆ្នាំ២០១៧ នៅចំណុចបន្ទប់ជួល ភូមិរោងចក្រ សង្កាត់ភ្នំពេញថ្មី ដោយម្ចាស់មានឈ្មោះ គោក លី ហេង ភេទប្រុស អាយុ២៣ឆ្នាំ មុខរបរជាវិស្វករ ស្នាក់នៅបន្ទប់ជួល ភូមិរោងចក្រ សង្កាត់ភ្នំពេញថ្មី ខណ្ឌសែនសុខ និងមានស្រុកកំណើត ភូមិណាងកាឆាយ ឃុំគោក ស្រុកអូរជ្រៅ ខេត្តបន្ទាយមានជ័យ បានបាត់ម៉ូតូ១គ្រឿង ម៉ាក់សេ ១២៥ សេរីឆ្នាំ២០១០ ពណ៌ខ្មៅ ពាក់ស្លាកលេខបន្ទាយមានជ័យ 1E.0124 ដោយមុនពេលកើត ជនរងគ្រោះបានដាក់ម៉ូតូនៅក្នុងបរិវេណបន្ទប់ជួលដូចសព្វដង លុះពេលព្រឹកឡើង ពេលគាត់រៀបចំចេញទៅធ្វើការ ស្រាប់តែបាត់ម៉ូតូហើយក៏មកដាក់ពាក្យបណ្តឹងនៅប៉ុស្តិ៍តែម្តង។
ចំណែកករណីទី៣ កើតឡើងកាលពីវេលាម៉ោង៣និង៣០នាទីរំលងអធ្រាត្រ ឈានចូលថ្ងៃទី៣០ ខែមីនា ឆ្នាំ២០១៧ នៅណុចផ្ទះសំណាក់យីហោ ឡាណា ដែលមានទៅតាំង ស្ថិតនៅភូមិរោងចក្រ សង្កាត់ភ្នំពេញថ្មី ខណ្ឌសែនសុខ ដោយម្ចាស់ម៉ូតូរងគ្រោះ ឈ្មោះ ច្រឹង ភារះ ភេទប្រុស អាយុ៣៥ឆ្នាំ មុខរបរបុគ្គលិកហាង ស្នាក់នៅភូមិឡកំប៉ោ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
ប្រភពពីបុរសរងគ្រោះម្ចាស់ម៉ូតូបានឲ្យដឹងថា រូបគាត់បានចូលទៅដេកនៅក្នុងផ្ទះសំណាក់ខាងលើ តាំងពីក្បាលព្រលប់ លុះដល់ម៉ោងកើតហេតុ ស្រាប់តែឮសូរម្ចាស់ផ្ទះសំណាក់ស្រែកឆោឡោថា ចោរហើយក្រោយមកគាត់ ក៏នាំគ្នាចុះមកមើលទើបដឹងថា ចោរលួចកាត់សោច្រវាក់យកម៉ូតូរបស់គាត់ទៅបាត់។ ម៉ូតូដែលចោរលួចទៅនោះម៉ាក SOOMER X ពណ៌ព្រឹងទំពាក់ស្លាកលេខ ភ្នំពេញ 1DM0101 ។
ប្រជាពលរដ្ឋដែលជាម្ចាស់ម៉ូតូរងគ្រោះបានមកដាក់ពាក្របណ្តឹងបាននិយាយថា កន្លងមកមានករណីបាត់ម៉ូតូ និងរថយន្តច្រើនលើកច្រើនសារហើយ មិនដែលឃើញសមត្ថកិច្ចចាប់ជនល្មើសបានទេ ៕ តុង សីហា
