សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: រថយន្តកូរ៉េ ដឹកភេសជ្ជ:មួយគ្រឿង ចំណុះ៥តោន ខណៈអ្នកបើកបរកំពុងបើកបត់ត្រឡប់ក្រោយមិនប្រយ័ត្នបានជ្រុលចង្កូតទៅបុកបង្គោលភ្លើងមួយដើមនៅមុខផ្ទះគេបង្កឲ្យមានការភ្ញាក់ផ្អើល កាលពីវេលាម៉ោង៧និង១០នាទីព្រឹក ថ្ងៃទី៣១ ខែមីនា ឆ្នាំ២០១៧ នៅត្រង់ចំណុចម្ដុំក្បែរស្តុបផ្សារដីហុយ ស្ថិតតាមបណ្ដោយផ្លូវ១៩៨៦ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញ រថយន្តកូរ៉េដឹកភេសជ្ជ:ទម្ងន់៥តោន មួយគ្រឿង ពណ៌ស ពាក់ស្លាកលេខ ភ្នំពេញ 3C- 3743 រួមដំណើរដោយបុរស២នាក់ជាកម្មករលើកដាក់ទំនិញ ធ្វើដំណើរតាមបណ្តោយផ្លូវលេខ១៩៨៦ ក្នុងទិសដៅពីលិចមកកើត ក្នុងល្បឿនលឿន។ ខណ:មកដល់ចំណុចកើតហេតុ ស្រាប់គេឃើញអ្នកបើកបររថយន្តនេះបានបួងចង្កូតបត់ត្រឡប់ក្រោយវិញយ៉ាងលឿនហើយទំនង ជាន់ហ្វ្រាំងមិនទាន់ ក៏ជ្រុលល្បឿនទៅបុកបង្គោលភ្លើងបណ្ដាលឲ្យបាក់ទ្រេតមកលើរថយន្ត តែសំណាងល្អមិនមានបង្កការគ្រោះថ្នាក់ដល់អ្នកដទៃនោះឡើយ។
ក្រោយកើតហេតុ អ្នកបើកបរថយន្ត និងអ្នករួមដំណើរទាំង២នាក់ ផ្សេងទៀត បានបើកទ្វាររថយន្តរត់គេចខ្លួនបាត់ស្រមោល បន្សល់ទុកតែរថយន្តនៅកាត់ទទឹងផ្លូវនៅមុខផ្ទះគេ បង្កឲ្យមានការកកស្ទះដល់អ្នកធ្វើដំណើរតាមដងផ្លូវពិបាកក្នុងការធ្វើដំណើរ។
ក្រោយពេលកើតហេតុសមត្ថកិច្ចនគរបាលចរាចរខណ្ឌសែនសុខបានចុះមកវាស់វែងយករថយន្តបង្កខាងលើប្រគល់ឲ្យនគរចរាចររាជធានីភ្នំពេញ ដោះស្រាយតាមផ្លូវច្បាប់៕ តុង សីហា
