សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ កាលពី ថ្ងៃទី៤ ខែមេសា ឆ្នាំ២០១៧ វេលាម៉ោង៩ និង១៥នាទីយប់ មានគ្រោះថ្នាក់ចរាចរណ៍មួយកើតឡើង នៅមុខសាលារៀនខ្មែរឥស្លាម ក្នុងភូមិបឹងតាព្រហ្ម ឃុំបឹងតាព្រហ្ម ស្រុកព្រៃនប់ ខេត្តព្រះសីហនុ រវាងរថយន្តកាមរីស្វិតកាត់ដំបូលបុកជាមួយម៉ូតូហុងដា C125 បណ្តាលឲ្យអ្នកបើកម៉ូតូរងរបួសបាក់ជើងម្ខាង ប៉ុន្តែគេនៅមិនទាន់ស្គាល់អត្តសញ្ញាណទេ ហើយត្រូវបានបញ្ជួនទៅព្យាបាលនៅមន្ទីរពេទ្យចំការចេកខេត្តព្រះសីហនុ។ ចំណែកមធ្យោបាយទាំងពីរ ត្រូវបានយកទៅរក្សាទុកនៅប៉ុស្តិ៍នគរបាល ឃុំបឹងតាព្រហ្ម ដើម្បីដោះស្រាយតាមច្បាប់។
នគរបាលស្រុកឲ្យដឹងថា ម៉ូតូជនរងគ្រោះមិនមានស្លាកលេខទេ រីឯរថយន្តដែលបុកជនរងគ្រោះម៉ាក កាមរីស្វិត ពាក់ស្លាកលេខ ភ្នំពេញ 2B-1940 ហើយអ្នកបើកបរក្រោយកើតហេតុបានរត់គេចខ្លួន។
សូមបញ្ជាក់ ផ្លូវនេះបំបែកចេញពីផ្លូវជាតិលេខ៤ ត្រង់ផ្សារអូរចំណារ ឃុំអូរឧកញ៉ាហេង ទៅកាន់កោះខ្យង ពីមុនគ្រាន់តែជាផ្លូវគ្រួសក្រហមចាស់ទ្រុធទ្រោមមួយប៉ុណ្ណោះ តែឥឡូវអាជ្ញាធរខេត្ត បានជួសជុលចាក់បេតុងថ្មីៗ ធ្វើឲ្យងាយស្រួលដល់ការធ្វើដំណើររបស់ប្រជាពលរដ្ឋ។ ក៏ប៉ុន្តែក៏អាចនឹងងាយជួបគ្រោះថ្នាក់ដែរ បើរអ្នកបើកបរលឿនហួសកំណត់ ខ្វះការប្រុងប្រយ័ត្នល្មើលច្បាប់ចរាចរណ៍៕ សហការី
