សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ យុវជនម្នាក់បានដេកស្លាប់ក្នុងថ្លុកឈាមមើលទៅគួរឲ្យរន្ធត់ បន្ទាប់ពីយុវជនរូបនេះត្រូវរថយន្តបែនដឹកដីបើកបុក ខណៈកំពុងជិះម៉ូតូតាមបណ្តោយផ្លូវជាតិលេខ២១បេ ត្រង់ចំណុចស្ថានីយ៍ប្រេងឥន្ទនៈសូគីម៉ិចទួលក្រសាំង ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ នៅវេលាម៉ោង១០ និង១០នាទី ថ្ងៃទី០៣ ខែឧសភា ឆ្នាំ២០១៧ ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា យុវជនរងគ្រោះឈ្មោះ ចំរើន រិទ្ធីស័ក្ត ភេទប្រុស អាយុ១៦ឆ្នាំ មានទីលំនៅភូមិព្រែកកាត់ សង្កាត់តាក្តុល ក្រុងតាខ្មៅ ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០០៩ ពាក់ស្លាកលេខ កណ្តាល1I-3898 ។ ចំណែកឯរថយន្តបង្កជាប្រភេទរថយន្តបែនដឹកដី មិនស្គាល់ម៉ាកក្រោយពីបើកបុកម៉ូតូបណ្តាលឲ្យមានមនុស្សស្លាប់បាត់បង់ជីវិតបានបើកគេចខ្លួនបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញរថយន្តបែនដឹកដីបើកបោះពួយយ៉ាងលឿនតាមបណ្តោយផ្លូវលំក្នុងទិសដៅពីកើតទៅលិច ហើយបានបត់ឆ្វេងឡើងទៅលើផ្លូវជាតិលេខ២១បេ ខណៈនោះបានជ្រុលទៅបុកម៉ូតូជនរងគ្រោះដែលកំពុងបើកបរក្នុងទិសដៅពីត្បូងទៅជើង បណ្តាលឲ្យជនរងគ្រោះដួលបោកទៅលើផ្លូវស្លាប់យ៉ាងអណោចអធ័ម ។ក្រោយពីបុកម៉ូតូបណ្តាលឲ្យមានមនុស្សស្លាប់បាត់បង់ជីវិតអ្នកបើកបររថយន្តបង្កបានគេចឆ្ពោះទៅទិសខាងត្បូងបាត់ស្រមោល ។ ដោយឡែកម៉ូតូ និងសាកសពជនរងគ្រោះត្រូវបានសមត្ថកិច្ចនករបាលចរាចរណ៍ក្រុងតាខ្មៅប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕ស្អាងជ័យ
រូបជនរងគ្រោះ កាលនៅរស់
