សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ក្នុងចំណោម២នាក់ ត្រូវបានប្រជាពលរដ្ឋចាប់ឃាត់ខ្លួនប្រគល់ឲ្យសមត្ថកិច្ចប៉ុស្តិ៍ទឹកថ្លា ខណៈធ្វើសកម្មភាពឆក់យកកាបូបពីកម្មការិនីម្នាក់បានសម្រេចតែពេលជិះម៉ូតូគេចខ្លួនទៅបុកនឹងទួលដែលកាត់ទទឹងបណ្តាលឲ្យធ្លាក់អ្នកក្រោយ ដោយឡែកអ្នកឌុបគេចខ្លួនបាត់ ។ ករណីនេះ កើតឡើងកាលពីវេលាម៉ោង៧ព្រឹក ថ្ងៃទី១៣ ខែឧសភា ឆ្នាំ២០១៧ នៅផ្លូវលំភូមិស្លែងរលើង សង្កាត់ទឹកថ្លា ខណ្ឌសែនសុខ។
សមត្ថកិច្ចបានឲ្យដឹងថា ជនសង្ស័យមានឈ្មោះ ហេង ម៉េងហុង អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិថ្មីសង្កាត់ស្ទឹងមានជ័យខណ្ឌមានជ័យ។
ចំណែកនារីរងគ្រោះជាម្ចាស់កាបូបឈ្មោះ ពើម ហួច មុខរបរកម្មការិនីរោងចក្រកាត់ដេរ ជីនវីន អ៊ីនដាស់ស្ទ្រី ស្នាក់នៅផ្ទះជួលក្រុម១ផ្លូវ លំភូ មិស្លែងរលើងសង្កាត់ទឹកថ្លាខណ្ឌសែនសុខ(កាបូបយកបានវិញ)។
ប្រភពបានប្រាប់ថា មុនកើតហេតុស្ត្រីរងគ្រោះបានដើរទៅដោយកាន់កាបូបពណ៌សូកូឡា នៅជាប់ដៃឆ្វេងខណះនោះស្រាប់តែមានជនសង្ស័យ២នាក់ជិះម៉ូតូកុបជ្រុងពណ៌ទឹកប៉ិចមកធ្វើសកម្មភាពឆក់យកកាបូបពីដៃនាងបានសម្រេចហើយព្យាយាមបើករត់ក៍ទៅបុកនិងទួលដែលប្រជាពលរដ្ឋចាក់កាត់ទទឹងផ្លូវបណ្តាលអោយធ្លាក់ជនសង្ស័យម្នាក់ខាងក្រោយត្រូវប្រជាពលរដ្ឋឃាត់បានហើយម្នាក់ទៀតជិះម៉ូតូកេចបាត់កូនកាបូបយកបានអោយម្ចាស់វិញ។
បច្ចុប្បន្នជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខរង់ចាំបញ្ជូនទៅសាលាដំបូងរាជធានីភ្នំពេញពេលក្រោយ៕ តុង សីហា
