សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក លាង សំណាត់ ចៅក្រមស៊ើបសួរសាលាដំបូងរាជធានីភ្នំពេញ នៅរសៀលថ្ងៃទី១៦ ខែឧសភា នេះ សម្រេចឃុំខ្លួនកូនប្រុសនាយហុងដា និង សង្សារ ពាក់ព័ន្ធករណីឃាតកម្មសម្លាប់ម្តាយក្រោយ ។ មន្ត្រីកងរាជអាវុធហត្ថរាជធានីភ្នំពេញ បានដឹកបញ្ជូនពួកគេទាំងពីរនាក់ទៅពន្ធនាគារហើយ ។
គួរបញ្ជាក់ថា លោក ស៊ិន វីរៈ ព្រះរាជអាជ្ញារងអមសាលាដំបូងរាជធានីភ្នំពេញ បញ្ជាក់ថា កូនប្រុសនាយហុងដា ត្រូវចោទប្រកាន់ពីបទ ឃាតកម្មគិតទុកជាមុន តាមមាត្រា២០០នៃក្រមព្រហ្មទណ្ឌ ។ រីឯសង្សារកូនប្រុសនាយហុងដា ត្រូវបានចោទប្រកាន់ពីបទសមគំនិតក្នុងអំពើឃាតកម្មគិតទុកជាមុន តាមមាត្រា២៩និងមាត្រា២០០នៃក្រមព្រហ្មទណ្ឌ ។
បទល្មើសនេះកំណត់ការផ្តន្ទាទោសដាក់ពន្ធនាគារអស់មួយជីវិត ។
កូនប្រុសនាយហុងដា និង សង្សារ ត្រូវបានកម្លាំងកងរាជអាវុធហត្ថរាជធានីភ្នំពេញ បញ្ជូនដល់អយ្យការអមសាលាដំបូងរាជធានីភ្នំពេញ នៅព្រឹកថ្ងៃទី១៥ ខែឧសភា ដើម្បីសាកសួរករណីសម្លាប់ម្តាយក្រោយ ។ មន្ត្រីតុលាការ បញ្ជាក់ថា រហូតមកទល់ល្ងាចថ្ងៃដដែល ជនសង្ស័យទាំងពីរនាក់ កំពុងស្ថិតក្រោមការសាកសួររបស់លោក ស៊ិន វីរៈ ព្រះរាជអាជ្ញារងអមសាលាដំបូងរាជធានីភ្នំពេញ ដោយពុំទាន់សម្រេចយ៉ាងណានៅឡើយទេ ។
ជនសង្ស័យទី១ ឈ្មោះ ខា សុខេន ហៅនិច ភេទប្រុស អាយុ១៨ឆ្នាំ ជាកូនប្រុសបង្កើត របស់លោកហុងដា និងជនសង្ស័យទី២ ឈ្មោះ នេត រស្មីកន្និកា ភេទស្រី អាយុ១៧ឆ្នាំ មុខរបរបុគ្គលិកនៅហាង រស្មីបឹងកក់។
ជនសង្ស័យទាំង២នាក់ត្រូវបាន កម្លាំងជំនាញ ការិយាល័យព្រហ្មទណ្ឌ អាវុធហត្ថរាជធានីភ្នំពេញ បានសហការជាមួយមូលដ្ឋាន អាវុធហត្ថខណ្ឌដង្កោ និងខណ្ឌជ្រោយចង្វារ ធ្វើការឃាត់ខ្លួនកាលពីថ្ងៃទី១២ ខែឧសភា ឆ្នាំ២០១៧ កន្លងទៅ។
យោងតាមរបាយការណ៍របស់សមត្ថកិច្ចជនសង្ស័យឈ្មោះ ខា សុខេនបានសារភាពថា រូបគេពិតជាបានធ្វើ សកម្មភាព សម្លាប់ម្តាយចុងឈ្មោះ ស៊ឹម ចន្ធី អាយុ១៩ឆ្នាំ ពិតបា្រកដមែន គឺធ្វើសកម្មភាព តែម្នាក់ឯង កាលពីយប់ថ្ងៃទី១០ ខែឧសភា ឆ្នាំ២០១៧ នៅបន្ទប់ខុនដូ របស់ឪពុកបង្កើតគេ (នាយហុងដា) តែក្រោយពេលសម្លាប់រួច សង្សាររបស់ខ្លួនមកពី ធ្វើការវិញទាន់ ខ្លួនក៏បានអង្វរសង្សារ កុំឲ្យឆោឡោ និងជួយយកភួយ មករុំសាកសព អូសទៅទុក នៅបន្ទប់ទឹក ព្រមទាំង ដោះយកកងដៃ២១កង ជញ្ជៀន១វង់ ទូរសព្ទណូគា ១គ្រឿង និងម៉ូតូមួយគ្រឿង ចាកចេញតែងម្តង ដែលរឿងនេះ បានបង្កឲ្យមានការភ្ញាក់ផ្អើល ពេញផ្ទៃប្រទេស ពិសេសបណ្តាញសង្គម ហ្វេសប៊ុក ។
ជនសង្ស័យបានរៀបរាប់ថា រូបគេបានមករស់នៅ ខុនដូជាមួយឪពុក និងម្តាយចុង ប្រហែល៤ ទៅ៥ខែមកហើយ ព្រោះម្តាយបង្កើតឈ្មោះ រ៉េន សុធារី ហៅឃ្មឹប ដែលត្រូវជាប្រពន្ធមុនរបស់នាយហុងដា មានប្តីថ្មីហើយ។ ក្នុងពេលមករស់នៅ ជាមួយឪពុក ជនសង្ស័យ បាននាំសង្សាឈ្មោះ នេត រស្មីកន្និកា មកនៅជាមួយ ហើយរូបគេ មានគម្រោង សម្លាប់ម្តាយចុងនេះ តាំងពី២ថ្ងៃមុនមកម្ល៉េះ ដើម្បីប្លន់យកគ្រឿងអលង្ការ ព្រោះម្តាយចុង បានប្រាប់ថា គ្រឿងអលង្កាគាត់ មានតម្លៃជិត ១ពាន់ដុល្លារអាមេរិក ហើយម្យ៉ាងទៀត ខ្លួនមិនសូវចូលចិត្ត ម្តាយចុងទេ ដោយសារនៅពេល ដែលឪពុកខ្លួន មិននៅផ្ទះ ម្តាយចុងតែងតែជេរ និងស្តីបន្ទោស ឲ្យខ្លួនជាញឹកញាប់ ធ្វើឲ្យខ្លួនមានគំនុំ មករហូត។
ក្រោយពេលសម្លាប់ ម្តាយចុងរួចហើយ ជនសង្ស័យ បានទៅសម្រាកនៅផ្ទះម្តាយសង្សារ ១យប់ នៅខណ្ឌឬស្សីកែវ លុះព្រឹកឡើង ទើបនាំសង្សាមកដេក ស្នាក់នៅជក់ថ្នាំញៀន នៅចំនុចផ្ទះគ្មានលេខ ភូមិ១ សង្កាត់ជ្រោយចង្វា ខណ្ឌជ្រោយចង្វា (ខាងក្រោយវិហារចាម) រីឯគ្រឿងអលង្ការ ដែលរូបគេប្លន់បាន យកទៅបញ្ចាំបាន ៤ម៉ឺនរៀល ព្រោះអ្នកបញ្ចាំ ប្រាប់ថាកាឡៃ ហើយម៉ូតូ បញ្ចាំបាន១០០ដុល្លារ រួចយកលុយ ទាំងនោះទិញថ្នាំញៀនជក់។
ជនសង្ស័យបានបញ្ជាក់ថា រូបគេធ្លាប់បាន ប្រើប្រាស់គ្រឿងញៀន តាំងពីឆ្នាំ២០១៤មក តាំងពីខ្លួននៅផ្ទះ ជួលម្តុំភោជនីយដ្ឋាន ហង្សនាគ ព្រែកលៀប ដោយដំបូងឡើយ ប្រើប្រាស់តាមរយ: ក្រុមក្មេងស្ទាវ ម្តុំវត្តកៀនឃ្លាំង ដោយពួកនោះ ប្រាប់ថាថ្នាំញៀន ពេលជក់ហើយ ធ្វើឲ្យមានកម្លាំង មិនសូវឃ្លានបាយ និងក្លាហាន ហើយធ្វើឲ្យសប្បាយ។ នៅថ្ងៃដែលរូបគេ សម្លាប់ម្តាយចុង រូបគេកំពុងតែ ស្រវឹងគ្រឿងញៀននៅឡើយ ព្រោះគេទើបតែ មកពីជកថ្នាំញៀន ជាមួយឈ្មោះង៉ែត ២ថ្ងៃជាប់គ្នា៕ ចេស្តា
