សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសទំនងជាអ្នកមានមុខមាត់ម្នាក់ ត្រូវបានកម្លាំងកងរាជអាវុធហត្ថខណ្ឌដូនពេញ ចុះមកនាំខ្លួនបង្កជាការភ្ញាក់ផ្អើល កាលពីវេលាម៉ោង១០ព្រឹក ថ្ងៃទី១៧ ខែឧសភា ឆ្នាំ២០១៧ នៅចំណុចភោជនីយដ្ឋានភូមិកោះកុង ក្បែរសណ្ឋាគារហូលីដេ តាមផ្លូវលេខ៨៤ សង្កាត់ស្រះចក ខណ្ឌដូនពេញ ។
ប្រភពព័ត៌មានពីប្រជាពលរដ្ឋដែលរស់នៅជិតខាងនោះ បានឲ្យដឹងថា នៅព្រឹកថ្ងៃកើតហេតុ គេឃើញបុរសអាយុប្រហែល៥០ឆ្នាំម្នាក់ ស្លៀកពាក់ឈុតអង្គរក្ស ពាក់វែនតា ទំនងជាចេញពីកន្លែងស្នាក់នៅក្នុងផ្ទះសំណាក់ហេងពេជ្រ បានចេញមកហូបអាហារពេលព្រឹកនៅភោជនីយដ្ឋានភូមិកោះកុង ស្រាប់តែដល់ម៉ោងកើតហេតុ ក៏ឃើញកម្លាំងកងរាជអាវុធហត្ថខណ្ឌដូនពេញ២-៣នាក់ដោយខ្លះស្លៀកស៊ីវិល និងស្លៀកឯកសណ្ឋាន បានមកឃាត់បុរសរូបនោះ ដោយតម្រូវឲ្យគាត់ឡើងលើម៉ូតូ ព្រោះមិនចង់ចាប់វ៉ៃខ្នោះ មិនចង់ឲ្យមានការភ្ញាក់ផ្អើលធំដុំនោះ ។
ប្រភពបានបន្តទៀតថា បុរសម្នាក់ដែលត្រូវកម្លាំងកងរាជអាវុធហត្ថឃាត់ខ្លួននោះ ទំនងជាអ្នករកស៊ីធំដុំមួយអាចជាប់ពាក់ព័ន្ធរឿងលុយកាក់ ដីធ្លី ឬក៏រកស៊ីឈើ ប្រហែលជាមានអ្នកប្តឹងនៅទីបញ្ជាការកងរាជអាវុធហត្ថរាជធានីភ្នំពេញ ទើបកម្លាំងកងរាជអាវុធហត្ថខណ្ឌដូនពេញមកនាំខ្លួនយ៉ាងប្រញ៉ាប់ទៅទីបញ្ជាការកងរាជអាវុធហត្ថរាជធានីភ្នំពេញតែម្តង ។
ប្រភពព័ត៌មានពីកម្លាំងដែលចុះប្រតិបត្តិការ បានបញ្ជាក់យ៉ាងខ្លីថា មូលហេតុនេះពាក់ព័ន្ធរឿងលុយកាក់ ៕ស តារា
