បង្ក្រាបគ្រឿងញៀនឃាត់ខ្លួនជនសង្ស័យម្នាក់នៅប៉ៃលិន

ខេត្តប៉ៃលិន៖ កម្លាំងសមត្ថកិច្ចបានអនុវត្តតួនាទីបង្ក្រាបគ្រឿងញៀន ឈានដល់ឃាត់ខ្លួនជនសង្ស័យជួញដូរថ្នាំញៀនម្នាក់ និងឈានដល់ចាប់ខ្លួនអ្នកប្រើប្រាស់២នាក់បន្ថែមទៀត រួមជាមួយវត្ថុតាងផងដែរ ។

ករណីនេះកើតឡើងកាលពីវេលាម៉ោង២០ ថ្ងៃទី១៧ ខែឧសភា ឆ្នាំ២០១៧ ដោយក្រោមការដឹកនាំរបស់លោក ឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន លោក វរសេនីយ៍ត្រី អ៊ុំ សាឡន បានសហការជាមួយកម្លាំងចរាចរណ៍ កំពុងចុះអនុវត្តន៍ច្បាប់ចរាចរណ៍តាមដងផ្លូវ ដើម្បីបង្ក្រាបករណីជួញដូរគ្រឿងមួយករណីនៅចំណុចស្ថិតក្នុងភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដោយឃាត់ខ្លួនជនសង្ស័យបាន១នាក់ ឈ្មោះ ឌី រីដា ហៅធា ភេទស្រី អាយុ ១៨ឆ្នាំ រស់នៅភូមិអូរគន្ធា ស្រុកស្ទឹងសែន ខេត្តកំពង់ធំ រួមនឹងភស្តុតាងថ្នាំញៀនប្រភេទ ម៉ាទឹកកក (ICE) ចំនួនមួយកញ្ចប់ធំ ស្មើនឹង ១,០០០ក្រាម ។

បន្ទាប់ពីសាកសួរ និងស្រាវជ្រាវរួចមកឈានដល់ឃាត់ខ្លួនជនសង្ស័យប្រើប្រាស់បាន២នាក់ទៀត នៅចំណុចស្ថិតក្នុងភូមិអូរតាប្រាង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។

បច្ចុប្បន្នសមត្ថកិច្ចជំនាញកំពុងចាត់ការតាមនិតិវិធីច្បាប់ ៕ ស សារ៉េ