សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលព្រហ្មទណ្ឌខណ្ឌមានជ័យបាន ចុះបង្រ្កាបករណី ជួញដូរគ្រឿងញៀនដល់ក្នុងផ្ទះ ហើយឃាត់ខ្លួនបានជនសង្ស័យ២នាក់មាន ប្រុសម្នាក់និងស្រ្តីជាមេជួញដូរ គ្រឿងញៀន និងរឹបអូសថ្នាំញៀនប្រភេទក្រាមសថ្លា១ថង់ និងក្នុងនោះថ្នាំក្រាមសថ្លា ៥កញ្ចប់ថង់តូច ដែលជនសង្ស័យលាក់ ក្នុងសុដន់កាលពីរសៀលថ្ងៃទី២៥ ខែឧសភាឆ្នាំ២០១៧ នៅ ក្រុម៣៨ ស្ថិតនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
សមត្ថកិច្ចឲ្យដឹងថា ជនសង្ស័យដែលឃាត់ខ្លួនទី១ ឈ្មោះ ហ្វាម ធីធូ ភេទស្រី អាយុ២៧ឆ្នាំ មុខរបរមិនពិតប្រាកដ ស្នាក់នៅផ្ទះគ្មានលេខផ្លូវលំ ក្រុម៣៨ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ (ជួញដូរ) សារធាតុញៀនខុសច្បាប់ ជាម្ចាស់ថ្នាំក្រាមសថ្លា ចំនួន៥កញ្ចប់ ថង់តូច និងជនសង្ស័យទី២ មានឈ្មោះ យ៉ា យ៉ាំងប៊ិន ភេទប្រុស អាយុ៣៨ឆ្នាំ មុខរបរកម្មករសំណង់ ស្នាក់នៅភូមិទួលរកា សង្កាត់ចាក់អង្រែក្រោម ខណ្ឌមានជ័យ ជាអ្នកប្រើប្រាស់ថ្នាំញៀន ។ទាំងពីរនាក់ជាជនជាតិវៀតណាម ។
អធិការរងទទួលផែនយុត្តិធម៌ ខណ្ឌមានជ័យ លោក ម៉េង វិមានតារា បានមានប្រសាសន៍ឲ្យដឹងថា មុនការចុះបង្រ្កោបនៅទីតាំងខាងលើ ជនសង្ស័យស្រ្តីជួញដូរថ្នាំ ញៀនត្រូវបានប្រជាពលរដ្ឋទូរស័ព្ទប្ដឹងទៅលោកថា មានស្រ្តីម្នាក់តែងតែនាំ ក្មេងស្ទាវមកជក់ និងប្រើប្រាស់ថ្នាំញៀនដល់ក្នុងផ្ទះ។ ក្រោយមកលោក ក៏សុំយោបល់លោកអធិការនគបាលខណ្ឌនិងដោយមានការអនុញ្ញាតពីលោកអធិការរួចហើយ លោកបានដឹកនាំកម្លាំងសហការជាមួយនគរបាលប៉ុស្តិ៍ចាក់អង្រែក្រោម ចុះទៅបង្រ្កោបដល់កន្លែងហើយឃាត់បានជនសង្ស័យ បានចំនួន២នាក់។បន្ទាប់មកកម្លាំងសមត្ថកិច្ចឆែកឆេរ កន្លែងស្នាក់នៅមិនឃើញអ្វីទេ ទើប លោកឲ្យសមត្ថកិច្ចជាស្រ្តី ឆែកលើខ្លួនប្រាណស្រី្តឈ្មោះហ្វាម ធីធូ ក៏រកឃើញថ្នាំក្រាមសថ្លា១ថង់ ក្នុងនោះមាន៥កញ្ចប់ ថង់តូច ដែលស្រ្តីជនសង្ស័យរូបនេះ លាក់ទុកក្នុងសុដន់(អាវទ្រនាប់) ហើយក៏ឃាត់ខ្លួន ទាំងពីរនាក់យកទៅអធិការដ្ឋាន ដើម្បីសាកសួរនិងកសាងសំណុំរឿងតាមច្បាប ៕ ប្រាថ្នា
