សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរស៣នាក់ បានរងរបួសធ្ងន់ ហូរឈាមស្រោចខ្លួន បន្ទាប់ពីពួកគេបានចូលមកផឹកស៊ីនៅក្នុងហាងមួយកន្លែង យីហោ(សួនស្នេហ៍ចំកាដូង)ហើយត្រូវក្រុមផឹកស៊ីនៅតុផ្សេងគ្នាគុបនឹងកែវស្រា បណ្ដាលបែកក្បាលហូរឈាមស្រោចខ្លួន ។
ហេតុការណ៍នេះ បានកើតឡើងកាលពីវេលាម៉ោងរំលងអធ្រាត្រឈានចូលថ្ងៃទី២៧ ខែមិថុនា ឆ្នាំ២០១៧ នៅត្រង់ចំណុចហាងយីហោ(សួនស្នេហ៍ចំការដូង)ស្ថិតតាមបណ្ដោយផ្លូវ២១៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ជនរងគ្រោះមាន1.ឈ្មោះ ឃឹម សុផា ភេទប្រុស អាយុ៣០ឆ្នាំ មុខរបរ បើកឡានដឹកអេតចាយ 2.ឈ្មោះ ឃឹម សុភក្រ ភេទប្រុស អាយុ២៣ឆ្នាំ មុខរបរ បើកឡាន ដឹកអេតចាយ របួសដេរដប់ថ្នេរ 3.ឈ្មោះ ប៉ុន ធឿន ភេទប្រុស អាយុ៣១ មុខរបរ បើកឡានដឹកអេតចាយ ទាំងបីនាក់ស្នាក់នៅ កន្លែងធ្វើការ សង្កាត់ដង្កោ ខណ្ឌដង្កោ។
បើតាមសម្ដីជនរងគ្រោះបានឲ្យដឹងថា មុនកើតហេតុគឺពួកគេមានគ្នាចំនួន៤នាក់ បាននាំគ្នាចូលមកផឹកស្រាបៀរនៅក្នុងហាងកើតហេតុខាងលើអស់ស្រាបៀរចំនួន៣ថូធំៗ ដោយពុំមានរឿងអ្វីឡើយលុះពេលផឹកស៊ីចប់ហើយឲ្យអ្នកលក់គិតលុយអស់ហើយ ពេលនោះពួកគេម្នាក់បានធ្វើធ្លាក់កែវបែកភ្លាមនោះ មានអ្នកអង្គុយផឹកតុជិតបានស្រែកថា ពួកអែងមានអីអស្ចារ្យគ្រាន់តែស្រែកហើយពួកគេបានយកកែវស្រាមកគុបតែម្ដងនិងយកដបស្រាមកវៃក្បាលបណ្ដាលឲ្យពួកគេបែកក្បាលរងរបួសចំនួន៣នាក់ភ្លាមៗ ក្រុមបង្កត្រូវបានអ្នកមើលការខុសត្រូវជម្លៀសឲ្យចេញបាត់អស់ ដោយពុំបានឃាត់ឲ្យនៅទទួលខុសត្រូវនោះទេ ធ្វើឲ្យប្រជាពលរដ្ឋដែលឃើញហេតុការណ៍ រិះគន់ទៅម្ចាស់ដែលមើលការខុសត្រូវថា រួមគំនិតគ្នាជាមួយអ្នកបង្ក ទើបមិនឃាត់ ។ ចំណែកខាងអ្នកមើលការខុសត្រូវនៅហាងខាងលើមិនអាចសុំការបំភ្លឺបានទេ ព្រោះអ្នកព័ត៌មានសួរមិនឆ្លើយតប។
ក្រោយពេលកើតហេតុ សមត្ថកិច្ចបានចុះមកដល់កន្លែងកើតហេតុជួយអន្តរាគមន៍បានត្រឹមតែលួងលោង និងនាំជនរងគ្រោះទៅដេរមុខរបួសនៅពេទ្យបង្អែកដង្កោ ហើយណែនាំឲ្យជនរងគ្រោះដាក់ពាក្យបណ្ដឹងតែប៉ុណ្ណោះ៕ ភារ៉ា ដង្កោ
