សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រធានសាលាដំបូងរាជធានីភ្នំពេញ លោក តាំង ស៊ុនឡាយ កាលពីល្ងាចថ្ងៃទី២៩ ខែមិថុនា ឆ្នាំ២០១៧ បានថ្លែងប្រាប់ប្រភពព័ត៌មានក្នុងស្រុកថា ចៅក្រមចេញដីកាដោះលែងមន្ដ្រីអាដហុក៤រូប និងអគ្គលេខាធិការរងគ.ជ.ប មួយរូប ។
លោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រី ជាន់ខ្ពស់សមាគមអាដហុក ត្រូវបានលោកព្រះរាជអាជ្ញារង គុជ គឹមឡុង ចោទពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ រីឯលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ។
លោក ស៊ុនឡាយបញ្ជាក់ថា «ចៅក្រមបានចេញដីកាដោះលែងពួកគេទាំង៥នាក់ ហើយការដោះលែងអាចនឹងធ្វើឡើងនៅថ្ងៃនេះ» ។
ពួកគាត់ទាំង៥នាក់ត្រូវបានគេដោះលែងចេញពីពន្ធនាគារព្រៃស នៅវេលាម៉ោងប្រមាណ៧និង២០នាទីយប់ ថ្ងៃទី២៩ ខែមិថុនា ហើយបានជួបជុំគ្រួសារសាច់ញាតិប្រពន្ធកូនអស់ហើយផងដែរ ៕
