សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ត្រូវសមត្ថកិច្ច កងរាជអាវុធហត្ថលើផ្ទៃប្រទេសឃាត់ ខ្លួន កាលពីរសៀលថ្ងៃទី២៨ ខែមិថុនា ឆ្នាំ២០១៧ និងបានបញ្ជូនទៅកាន់សាលា ដំបូងរាជធានីភ្នំពេញពាក់ព័ន្ធពីបទឆបោក ប្រាក់ក្រោមរូបភាពជ្រើសរើសពលករទៅប្រទេសអូស្ត្រាលី ។
បុរសជាប់សង្ស័យ ដែលសមត្ថកិច្ចឃាត់ខ្លួនឈ្មោះ Vorn yen viliam ភេទប្រុស អាយុ៤៧ឆ្នាំ ជាអាណិកជនខ្មែរ រស់នៅសហរដ្ឋអាមេរិក។ ជនសង្ស័យត្រូវចាប់ខ្លួននៅក្នុងហាងកាហ្វេ park coffee ក្បែរផ្សារសុវណ្ណា កាលពីថ្ងៃទី២៦ ខែ មិថុនា ឆ្នាំ២០១៧ ដោយកម្លាំងសមត្ថកិច្ច កងអាវុធហត្តលើផ្ទៃប្រទេស ខណៈជនសង្ស័យទើប ជិះយន្តហោះពីសហរដ្ឋ អាមេរិកមកកម្ពុជាក្នុងបំណងមកចូលរួម ធ្វើបុណ្យសពឪពុក ។
ដើមចមនៃការឃាត់បុរសខាងលើនេះ ត្រូវបានប្រភពព័ត៌មាន ពីសាលាដំបូងបង្ហើបឲ្យដឹងថា ក្នុងអំឡុងឆ្នាំ២០១៦ ជនសង្ស័យធ្វើជាមេខ្យល់ក្នុងការជ្រើសរើស ពលករនាំទៅធ្វើការនៅប្រទេលអូស្ត្រាលី ។ពេលនោះមានមនុស្សជាច្រើននាក់បានទៅចុះឈ្មោះ ប៉ុន្តែមិនទាន់បានបង់ប្រាក់ទេមានតែមនុស្សប្រមាណ២០នាក់បានយកប្រាក់ទៅបង់ឲ្យជនសង្ស័យ ក្នុងម្នាក់ៗ ៣០០០ ទៅ ៦០០០ដុល្លារអាមេរិក ។
ប្រភពបន្តថា ក្រោយពីទទួលយកប្រាក់ពីអតិថិជន ដែលបង់ហើយ ស្រាប់តែជនសង្ស័យបានរត់គេចខ្លួន មិនដឹងទៅរស់នៅទីណា។ លុះពេលឪពុកស្លាប់ប៉ន្មានថ្ងៃ មុននេះបានឃើញមុខជនសង្ស័យមកចូលរួមពិធីបុណ្យសពពេលនោះដើមបណ្តឹង បានជូនដំណឹងទៅសមត្ថកិច្ចឲ្យឃាត់ខ្លួននិងនាំទៅកាន់សាលាដំបូងរាជធានីភ្នំពេញដើម្បីចាត់ការតាមច្បាប់ ។
ព្រះរាជអាជ្ញាអមតុលាការកំពុងសាកសួរជនសង្ស័យនៅឡើយដោយមិនទាន់សម្រេចបែបណាទេនៅឡើយ៕ ហេង នរិន្ទ្រ
