សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ក្រុមប្រឹក្សាសង្កាត់ទាំងអស់ ត្រូវតែរួបរួមសាមគ្គីគ្នាជាធ្លុងមួយ និងកុំញុះញង់គ្នា ឬលាបពណ៌គ្នា ដែលអាចធ្វើឲ្យយើងបែកបាក់គ្នាក្នុងការបម្រើប្រជាពលរដ្ឋឲ្យទាន់ពេលវេលានោះហើយក៏មិនត្រូវប្រកាន់បក្សពួកនិយមនោះទេ ។
លោក សុខ ពេញវុធ អភិបាលនៃគណៈអភិបាលខណ្ឌដូនពេញ បានមានប្រសាសន៍ដូច្នេះនារសៀលថ្ងៃទី០៤ ខែកក្កដា ឆ្នាំ២០១៧ នៅសង្កាត់ស្រះចក ខណ្ឌដូនពេញ ក្នុងពិធីប្រកាសសុពលភាពក្រុមប្រឹក្សាសង្កាត់ជាប់ឆ្នោតអាណត្តិទី៤ ក្នុងការបោះឆ្នោតក្រុមប្រឹក្សាឃុំ សង្កាត់ កាលពីថ្ងៃទី០៤ ខែមិថុនា ឆ្នាំ២០១៧ កន្លងមកនេះ មិនត្រូវធ្វើអ្វីតាមតែចិត្តខ្លួនឯងដែលផ្ទុយនឹងច្បាប់នោះឡើយ ហើយត្រូវគិតថាធ្វើអ្វីថ្ងៃនេះឲ្យល្អជាងថ្ងៃម្សិលមិញ ហើយសម្រាប់ថ្ងៃស្អែកត្រូវឲ្យល្អជាងថ្ងៃនេះ ក្នុងការបម្រើប្រជាពលរដ្ឋ និងការអភិវឌ្ឍក្នុងមូលដ្ឋាន ដោយមិនត្រូវមើលបំណាំគ្នានោះឡើយ។មិនត្រូវធ្វើបាបប្រជាពលរដ្ឋឬក៏មើលងាយអ្នកនេះអ្មកនោះគឺត្រូវផ្តល់សិទ្ធិសេរីភាពឲ្យស្មើៗគ្នា និងត្រូវដាក់ខ្លួនជាអ្នកបម្រើប្រជាពលរដ្ឋដោយពិតប្រាកដ ទើបអាចឆ្លើយតបជាមួយប្រជាពលរដ្ឋ ដែលពួកគាត់បោះឆ្នោតជូននាពេលកន្លងមកនោះ។
លោក សុខ ពេញវុធ អភិបាលនៃគណៈអភិបាលខណ្ឌដូនពេញបានលើកឡើងទៀតថាបច្ចុប្បន្ននេះប្រទេសកម្ពុជាមានប្រជាអធិបតេយ្យពេញលេញ តាំងពីថ្នាក់ក្រោមរហូតដល់លើ ដូច្នេះមេឃុំ ឬចៅសង្កាត់ ត្រូវបានបោះឆ្នោតដោយប្រជាពលរដ្ឋក្នុងរយៈពេល៥ឆ្នាំម្តង ដើម្បីជ្រើសរើសរកក្រុមប្រឹក្សាដែលមានសមត្ថភាព ដែលអាចជឿទុកចិត្តបាន សម្រាប់បម្រើសេវា និងជួយប្រជាពលរដ្ឋទាន់ពេលវេលា មិនប្រកាន់បក្សពួកនិយមនោះឡើយ។
លោកអភិបាលខណ្ឌដូនពេញបន្តថាយើងសុទ្ធតែជាឈាមខ្មែរ ដូចគ្នាទេអីចឹងត្រូវរួបរួមគ្នា កុំមើលបំណាំគ្នា ដើម្បីឲ្យឃុំសង្កាត់មានសុវត្ថិភាព ព្រោះយើងរស់នៅក្រោមដំបូលសុខសន្តិភាពតែមួយ ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកមុខមាត់ប្រទេសជាតិលើឆាកអន្តរជាតិជាបន្តបន្ទាប់មឥតឈប់ឈរ។
លោកអភិបាលខណ្ឌដូនពេញបន្តទៀតថាបើទោះជាកន្លងមកយើងមិនទាន់បានធ្វើការជាមួយគ្នា តែមកដល់ពេលនេះយើងបានមកធ្វើការជាមួយគ្នាហើយ ត្រូវតែផ្តល់ភាពកក់ក្តៅដល់ប្រជាពលរដ្ឋ ដែលលោកបានបោះឆ្នោតឲ្យយើងដូច្នេះ មិនត្រូវធ្វើឲ្យពួកគាត់លំបាកឡើយ។ហើយក្រុមប្រឹក្សាទាំងអស់ ត្រូវរួបរួមសាមគ្គីគ្នាជាធ្លង់មួយក្នុងការដឹងទុក្ខធុរៈប្រជាពលរដ្ឋជាធំ។
ជាមួយគ្នានោះដែរលោកអភិបាលក៏បានកោតសរសើរនិងផ្តាំផ្ញើទៅដល់លោកចៅសង្កាត់ ចៅសង្កាត់រង សមាជិកក្រុមប្រឹក្សាសង្កាត់ទាំងអស់ត្រូវខិតខំបន្តបំរើប្រជាពលរដ្ឋអោយបានល្អប្រសើរ និងត្រូវអនុវត្ត ការងារ តួនាទី អោយបានសមស្របតាមសេចក្តីណែនាំរបស់ក្រសួងមហាផ្ទៃ ព្រមទាំងសរាចរណែនាំផ្សេងៗរបស់រាជរដ្ឋាភិបាល៕ ស តារា
