សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តហាយឡែនឌ័រ បើកបរនៅក្នុងល្បឿនលឿន ខណៈមកដល់ផ្លូវបំបែកជាបួន មិនបានប្រុងប្រយត្ន័ជ្រុលទៅបុកម៉ូតូឌ្រីមសង់០៧ដែលបើកឆ្លងផ្លូវពេញទំហឹងអូសជិត១០ម៉ែត្រ បណ្ដាលអោយបុរសអ្នកបើកម៉ូតូរងរបួសធ្ងន់បាក់ឆ្អឹងកជើង ហេតុការគ្រោះថ្នាក់ ចរាចរណ៍នេះបានកើតឡើងកាលពីវេលាម៉ោង ០១និង២០នាទីរំលងអធ្រាត្រ ឈានចូលថ្ងៃទី ៦ ខែកក្ដដា ឆ្នាំ២០១៧ នៅតាមបណ្ដោយផ្លូវ១៦៣ កែងនឹងផ្លូវ៣៥០ ស្ថិតក្នុងសង្កាត់បឹងកេងកង៣ ខណ្ឌចំការមន រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតគេឃើញ ម៉ូតូម៉ាកឌ្រីមសង់ សេ១២៥ពណ៌ខ្មៅ សេរីឆ្នាំ២០០៧ ពាក់ស្លាកលេខ ភ្នំពេញ 1R-8906 បើកបរដោយបុរសម្នាក់ តាមបណ្ដោយផ្លូវ៣៥០ ទិសដៅពីលិចទៅកើត ខណៈមកដល់ចំណុចកើតហេតុ ដែលជាផ្លូវបំបែកជាបួន ស្រាប់តែមានរថយន្ត ហាយឡែនឌ័រ មួយគ្រឿង ពណ៌ ស្ករ ពាក់ស្លាកលេខ ភ្នំពេញ 2AH-1932 បើកបរ ដោយបុរសម្នាក់និងរួមដំណើរជាមួយស្ត្រីម្នាក់ទៀតធ្វើដំណើរតាមបណ្ដោយផ្លូវ១៦៣ ទិសដៅពីត្បូងទៅជើង ខណៈមកដល់ចំណុច កើតហេតុមិនប្រយត្ន័ ក៏ជ្រុលទៅបុកម៉ូតូដែលបើកឆ្លងផ្លូវ ពេញទំហឹងអូសជិត១០ម៉ែត្រ បណ្ដាលឲ្យបុរសអ្នកបើកម៉ូតូរបួសបាក់កជើងខាងស្ដាំ ភ្លាមៗត្រូវបានរថយន្ត សង្គ្រោះបន្ទាន់មន្ទីរពេទ្យសុខលាភមេត្រី ដឹកយកទៅសង្គ្រោះផងដែរ។ ចំណែកម៉ូតូជនរងគ្រោះត្រូវបានក្រុមអ្នកបើករថយន្តបង្កអូសយកទៅទុកនៅក្នុងផ្ទះរបស់គេ លុះពេលដែលអ្នកសារព័ត៌មានទៅថត បែជាមានស្ត្រីម្នាក់មកហាមមិនអោយថត ក្រោយមកដោយមានការពន្យល់ពីរសមត្ថកិច្ចទើបយកម៉ូតូចេញពីរផ្ទះមកទុកកន្លែងដើម ចំណែកស្ត្រីម្នាក់ដែលមកហាមប្រហែលជាដឹងខ្លួនខុស ក៏ឡើងជិះរថយន្តទៅបាត់។
ក្រោយពេលកើតហេតុសមត្ថកិច្ចមូលដ្ឋានបានមកដល់កន្លែងកើតហេតុហើយបានទាក់ទងទៅសមត្ថកិច្ចជំនាញមកធ្វើការវាស់វែងយករថយន្តបង្កនិងម៉ូតូទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរងចាំដោះស្រាយតាមនិតិវិធីច្បាប់នៅពេលក្រោយ ៕ ភារ៉ា ដង្កោ
