សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ កម្លាំងនគរបាលព្រហ្មទណ្ឌកម្រិតស្រាល នៃស្នងការនគរបាលខេត្ត សហការជាមួយ កម្លាំងនគរបាលស្រុកស្រីស្នំ ចុះស្រាវជ្រាវ តាមប្រមាញ់ រហូតឈានដល់ឃាត់ខ្លួនបានជនល្មើសម្នាក់ ទៅតាមដីការបស់តុលាការ ពីករណីប្លន់សម្លាប់ជនរងគ្រោះតាំងពីថ្ងៃទី១១ ខែកក្កដា ឆ្នាំ២០០៣មកម្ល៉េះ ហេតុការណ៍ ឃាត់ខ្លួនជនសង្ស័យនៅវេលាម៉ោង១១និង៣០នាទី ព្រឹកថ្ងៃទី១១ ខែកក្កដា ឆ្នាំ២០១៧ ស្ថិតនៅមុខផ្ទះប្រជាពលរដ្ឋ ស្រុកស្រីស្នំ ខេត្តសៀមរាប។
លោកវរសេនីយ៍ទោ ហង្ស សុផាតភីរម្យ នាយការិយាល័យព្រហ្មទណ្ឌនគរបាលកម្រិតស្រាល បានប្រាប់ថា ដោយយោងតាមដីកាចាប់ខ្លូនលេខ២៨០ ចុះថ្ងៃទី១៦ ខែកក្កដា ឆ្នាំ២០០៣ ចេញដោយចៅក្រមស៊ើបអង្កេត អៀង គឹមថុល និងក្រោមការដឹកនាំបញ្ជាផ្ទាល់ពីសំណាក់លោកវរសេនីយ៍ឯក ភឹង ចិន្តារ៉ត ស្នងការ រង ខេត្តសៀមរាប បានឲ្យលោកដឹកនាំកម្លាំងការិយាល័យព្រហ្មទណ្ឌនគរបាលកំរិតស្រាល សហការណ៍ជាមួយកម្លាំងអធិការដ្ឋាននគរបាលស្រុកស្រីស្នំ អនុវត្តដីកា ចាប់ខ្លួន មេចោរប្លន់ ដែលបានគេចខ្លូនអស់រយៈពេលជាង១០ឆ្នាំមកហើយ ។
ជនជាប់ ចោទឈ្មោះ រឿន រិន ហៅ ម៉ម រិន ភេទប្រុស អាយុ៥២ឆ្នាំ មានទីលំនៅ បច្ចុប្បន្ន នៅភូមិ រំដេង ឃុំ ត្រាំសសរ ស្រុក ស្រីស្នំ ខេត្តសៀមរាប ពី បទ ប្លន់ (ពីរករណី) កើត ហេតុកាលពីថ្ងៃទី២៧ ខែ ឧសភា ២០០៣ ស្ថិតនៅភូមិ ថ្មី និង ភូមិ ថ្នល់ ឃុំ ចាឈូក ស្រុក អង្គរជុំ ខេត្ត សៀមរាប។
លោកវរសេនីយ៍ឯក ភឹង ចិន្តារ៉ត បានបញ្ជាក់ថា ថ្មីៗនេះ លោកបានប្រជុំកម្លាំងនគរបាលការិយាល័យជំនាញព្រហ្មទណ្ឌ ក្រុង ស្រុក ទាំង១២៖ ទី១/ជំរុញតាមបង្ក្រាបមុខសញ្ញាមានដេកា ទី២/ជំរុញស្រាវជ្រាវឱ្យអស់លទ្ធភាពមុខសញ្ញា និង ទី៣/គឺ ល្បែងស៊ីសង ត្រូវអនុវត្តន៍ឱ្យមានតម្លាភាព។ ខណៈនេះអស់លក្ខណ៍ សមត្ថកិច្ចនគរបាលស្រុក ស្រីស្នំ ខេត្តសៀមរាបចាប់បាន ដូចពាក្យចាស់តែងពោលប្រាប់ថា «ជុង មិនអាចភ្លេចកុក មានតែកុក ភ្លេចជុង» ទោះ ខំប្រឹងរត់ទៅដល់ជើងមេឃ ក៏មិនអាចគេចផុតពីសមត្ថកិច្ចនគរបាលខេត្តសៀមរាបបានឡើយ។
បច្ចុប្បន្ន ជនសង្ស័យ(មេចោរប្លន់តាមស្រុក)ត្រូវបានកម្លាំងជំនាញបញ្ជូនទៅតុលាការ នៅរសៀលថ្ងៃទី១១ ខែកក្កដា ឆ្នាំ២០១៧ ដើម្បីចាត់ការតាមទៅតាមផ្លូវច្បាប់៕ ប៊ុនរិទ្ធី
