ធ្វើសកម្មភាពឆក់កាបូបមិនបានសម្រេចហើយថែមទាំងត្រូវសមត្ថកិច្ចចាប់ខ្លួនបានទៀត

ភ្នំពេញ : ជនសង្ស័យ២នាក់ ត្រូវកម្លាំងព្រហ្មទណ្ឌចំការមន និងកម្លាំងការប៉ុស្តិ៍ឃាត់ខ្លួន បន្ទាប់ពីធ្វើសកម្មភាពឆក់កាបូបនារីម្នាក់មិនបានសម្រេច ហើយរត់មិនរួច បង្កការភា្ញក់ផ្អើលកាលវេលាម៉ោង១និង៣០នាទីរសៀល ថ្ងៃទី១២ ខែកក្កដា ឆ្នាំ២០១៧ ស្ថិតតាមបណ្ដោយផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

សមត្ថកិច្ចឲ្យដឹងថា ជនសង្ស័យ មានឈ្មោះ ហួរ ហុយ ភេទ ប្រុស អាយុ ១៨ឆ្នាំ ស្នាក់នៅសង្កាត់ព្រៃឯង ខណ្ឌច្បារអំពៅ មុខរបរ មិនពិតប្រាកដ និងឈ្មោះ ហ៊ី មុនធី ភេទប្រុស អាយុ១៦ឆ្នាំ ស្នាក់នៅសង្កាត់ព្រៃឯង ខណ្ឌច្បារអំពៅ មុខរបរ មិនពិតប្រាកដ ។

ប្រភពបន្តថា ជនរងគ្រោះជិះម៉ូតូឌុបតាមផ្លូវស្ពាយកាបូបនៅដៃម៉ូតូ ខណៈមកពេលមកដល់ចំណុចផ្លូវកើតហេតុ ជនសង្ស័យ២នាក់ជិះមូ៉តូ២គ្រឿង ម៉ាកហុងដា c125 ពណ៍ខ្មៅ ពាក់ស្លាកលេខ ភ្នំពេញ 1GM.1842 និងមួយគ្រឿងទៀត ម៉ាកហុងដា c125 ពណ៍ទឹកមាស ពាក់ស្លាកលេខ ភ្នំពេញ1GL.1792ស្របទិសគ្នា មកពីក្រោយក៏ធ្វើសកម្មភាពឆក់កាបូបដៃពីនារីម្នាក់ មិន បានសម្រេចហើយ ភ្លាមៗនោះ ក៏ត្រូវកម្លាំងព្រហ្មទណ្ឌចំការមន សហការនឹងកម្លាំងប៉ុស្តិ៍ ដែលតាមពីក្រោយជនសង្ស័យ ធ្វើឲ្យក្រុមជនសង្ស័យភ័យ ក៏ត្រូវចាប់បានទាំង២នាក់នៅចំណុចជិតផ្សារបឹងកេងកង។

ចំណែកនារីរងគ្រោះមិនបានមកដាក់ពាក្យបណ្ដឹងទេ ដោយសារតែភ័យខ្លាំងពេក។

បច្ចុប្បន្នជនសង្ស័យខាងលើ រួមនឹងម៉ូតូត្រូវបានកម្លាំងនគរបាលនាំមកឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមន ដើម្បីសួរនាំចាត់ការតាមនីតិវិធី៕ ស រស្មី