សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀងៈ បុរសម្នាក់ខណៈកំពុងជិះកង់ ស្រាប់តែត្រូវរថយន្តមិនស្គាល់ម៉ាក បើកបុកយ៉ាងពេញទំហឺងលាន់សូរប្រ៉ាវ បង្កឲ្យមានការភ្ញាក់ផ្អើលដល់អ្នកភូមិចេញមកមើល ព្រមទាំងរាយការណ៏មកសមត្ថកិច្ចមូលដ្ឋានជួយសង្គ្រោះដែរ ប៉ុន្តែរបួសធ្ងន់ពេក ក៏ដាច់ខ្យល់ស្លាប់ភ្លាមៗ។
ហេតុការណ៏នេះ បានកើតឡើងកាលពីវេលាម៉ោង៧និង៣០នាទីយប់ ថ្ងៃទី១៧ ខែកក្កដា ឆ្នាំ២០១៧ ស្ថិតក្នុងភូមិសវាយប៉ោ ឃុំត្រពាំងស្ដៅ ស្រុករមាសហែក។
យោងតាមសមត្ថកិច្ចបានឲ្យដឹងថា បុរសដែលស្លាប់មានឈ្មោះ ពៅ ពន្លក អាយុ៣៧ឆ្នាំ មុខរបរកសិករ មានទីលំនៅក្នែរភូមិឃុំកើតហេតុខាងលើ ។ ចំណេកអ្នកបើករថយន្តមិនត្រូវបានស្គាល់អត្តសញ្ញាណនៅឡើយ ក្រោយពេលបង្កហេតុបានបើករថយន្តមិនស្គាល់ម៉ាកគេចខ្លួនបាត់ស្រមោលតែម្ដង។
បើតាមអ្នកភូមិបានឲ្យដឹងថា មុនកើតហេតុឃើញជនរងគ្រោះម្នាក់ឯងធ្វើដំណើរដោយជិះកង់ពីជើងមកត្បូង ហើយខណៈនោះ ស្រាប់តែលឺសូរសំឡេងប្រ៉ាវ មនុស្សស្រែកអ៊ុយជួយផង ក៏បាត់មាត់ឈឹង ចំណែករថយន្តបានបើកគេចចេញទៅទិសខាងត្បូងបាត់ស្រមោល។
ក្រោយមក ប្រជាពលរដ្ឋបានចេញមកមើល និងរាយការណ៏សមត្ថកិច្ចឲ្យមកជួយអន្តរាគមន៏សង្គ្រោះដែរ ប៉ុន្តែយឹតពេលទៅហើយ ។ ដោយឡែក កង់ដែលជនរងគ្រោះជិះនោះខ្ទេចដាច់កង់ជាពីរកំណាត់ផងដែរ។
សមត្ថកិច្ចមូលដ្ឋានបានចុះមកវាស់វែងរួចប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី និងស្រាវជ្រាវរករថយន្តបង្កហេតុនាំមកឲ្យទទួលខុសត្រូវតាមច្បាប់ ៕ យឹម សុថាន
