សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ ក្នុងចំណោមបក្ខពួក២នាក់ត្រូវជនរងគ្រោះ និងសមត្ថកិច្ចដេញតាមចាប់ បានបន្ទាប់ពីពួកគេធ្វើសកម្មភាពឆក់ទូរសព្ទ័ ដៃពីជនរងគ្រោះមិនបានសម្រេច ហើយជិះម៉ូតូទាក់ដៃចង្កូតម៉ូតូជនរងគ្រោះដួល ។
ហេតុការណ៍នេះបានកើតឡើងកាលពីវេលាម៉ោង១រំលងអាធ្រាត្រ ឈានចូលថ្ងៃទី២៥ ខែកក្កដា ឆ្នាំ២០១៧ នៅតាមបណ្ដោយផ្លូវម៉ៅសេទុង ត្រង់ចំណុចមុខ សណ្ឋាគារ អ៊ីនធឺខន ស្ថិតក្នុងសង្កាត់ទំនប់ទឹក ខណ្ឌចំការមន ។
ជនសង្ស័យដែលចាប់បានម្នាក់ មានឈ្មោះ ខន ឃៀង ភេទប្រុស អាយុ ១៩ឆ្នាំ មុខរបរជាងម៉ូតូ ស្នាក់នៅសង្កាត់ទួលសង្កែ ខណ្ឌឫស្សី កែវ ភូមិដូងឃុំដូង ស្រុកបាទី ខេត្តតាកែវ។
ចំណែកជនរងគ្រោះ មានឈ្មោះ នី ងិប ភេទប្រុស អាយុ៣០ឆ្នាំ មុខរបរបើកឡាន ស្នាក់បុរីភពថ្មីផ្លូវវេងស្រេង សង្កាត់ចោមចៅ ខណ្ឌពោធិសែនជ័យ ។
បើតាមសម្ដីជនរងគ្រោះបានប្រាប់ ឲ្យដឹងថា មុនពេលកើតហេតុរូបគាត់បានជិះម៉ូតូម៉ាក ឃ្លីក ពណ៌ក្រហម ពាក់ស្លាកលេខ ភ្នំពេញCL-7424 ចេញមកពីញាំនំបញ្ចុកនៅផ្សារដើមគ ខណៈ មកដល់ចំណុចកើតហេតុ គាត់បានឈប់ម៉ូតូអែបចិញ្ចើមផ្លូវយកទូរស័ព្ទចុចមើលព័ត៌មាន លុះពេលកំពុងមើលស្រាប់តែ មានជនសង្ស័យ២នាក់ជិះម៉ូតូ១គ្រឿង ម៉ាក ហ្សុយសាគីលែត ពណ៌ ស ពាក់ស្លាកលេខ តាកែង1N-4669 បានជិះមកក្បែរហើយធ្វើ សកម្មភាពឆក់យកទូរសព្ទ័ដៃតែមិនបានសម្រេច ពេលនោះជនសង្ស័យបានជិះម៉ូតូទាក់ដៃចង្កូតបណ្ដាលឲ្យដួល ត្រូវគាត់(ជនរងគ្រោះ)ស្រែកចោរៗ ស្របពេលដែលកម្លាំងសមត្ថកិច្ច កំពុងល្បាតនៅទីនោះបាន លឺក៏ដេញតាមចាប់បានម្នាក់ ចំណែកម្នាក់ទៀតរត់ គេចខ្លួនបាត់ស្រមោលបន្សល់ទុកនៅម៉ូតូដែល ជិះធ្វើសកម្មភាពនៅនឹងកន្លែងកើតហេតុ។
ក្រោយមក សមត្ថកិច្ចបាននាំយកមកសាកសួរនៅប៉ុស្តិទំនប់ទឹក និងកសាងសំណុំរឿងដើម្បីបញ្ចួនបន្តទៅកាន់ អធិការដ្ឋាននគរបាលខណ្ឌចំការមន ចាត់ការបន្តតាមច្បាប់៕ ភារ៉ា ដង្កោ
