សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ប៉ុន្មានថ្ងៃមកនេះ បណ្តាញទំនាក់ទំនងសង្គមហ្វេសប៊ុក ជាមួយនឹងសារព័ត៌មានក្នុងស្រុកជាច្រើន បានផ្សព្វផ្សាយអំពីហេតុការណ៍ដែលមន្ត្រីគយ ស្នាក់ការគយ និងរដ្ឋាករច្រកអូររំដួលរងនូវកណ្តាប់ដៃរបស់នាយទាហាន ក្នុងបន្ទប់ខារ៉ាអូខេ ដោយសារផ្ទុះកំហឹង ខណៈនាយយោធារូបនោះឃើញពីសកម្មភាពរបស់មន្ត្រីគយ និងមេគយច្រកអូររំដួលនេះតែម្តង យកឡានរបស់គាត់ ដែលគយចាប់ ទៅជិះ និងចូលខារ៉ាអូខេកម្សាន្តយ៉ាងរំភើយនោះ ។
រថយន្តម៉ាកតូយ៉ូតា VIOS ពណ៌ស ចង្កូតស្តាំ នាំចូលពីប្រទេសថៃ គ្មានពន្ធនាំចូល ត្រូវបានគយច្រកអូររំដួលចាប់ ដើម្បីឲ្យម្ចាស់ចូលខ្លួនបង់ពន្ធ ប៉ុន្តែមន្ត្រីគយ រួមទាំងមេច្រកនេះតែម្តង បែរជាយកវត្ថុតាងបទល្មើស ឡានគេចពន្ធទៅជិះប្រើប្រាស់ជាលក្ខណៈឯកជន និងបើកដឹកគ្នាទៅចូលខារ៉ាអូខេយ៉ាងសប្បាយ ភ្លេចគិតពីតួនាទី ភារកិច្ចរបស់ខ្លួន ទើបសាម៉ី ខ្លួនម្ចាស់ឡានទប់ចិត្តមិនបាន តាមទៅវាយមន្ត្រីគយដល់ក្នុងបន្ទប់ខារ៉ាអូខេ ។
ពាក់ព័ន្ធនឹងអំពើដ៏មិនថ្លៃថ្នូរនេះ នៅល្ងាចថ្ងៃទី២៣ ខែកក្កដា ឆ្នាំ២០១៧ លោកយ៉ែម ខែមរ៉ាត ប្រធានស្នាក់ការគយ និងរដ្ឋាករច្រកអូររំដួល បានបញ្ជាក់ប្រាប់សារព័ត៌មានថា រថយន្តខាងលើនេះ ត្រូវបានមន្ត្រីរបស់គាត់ចាប់រឹបអូសពីមន្ត្រីយោធាឈ្មោះថាន យុទ្ធឋាន ហៅគីម ហើយកូនចៅរបស់លោកឈ្មោះ ឈួន ឃីសាក់ មិនបានយកឡានខាងលើនេះជិះដើរលេងចូលខារ៉ាអូខេនោះឡើយ ។ តាមពិត រូបគាត់ គឺជាអ្នកជិះចេញពីស្នាក់ការកាលពីវេលាម៉ោង១០យប់ នៃថ្ងៃកើតហេតុ ខណៈមន្ត្រីរបស់គាត់ពេលផឹកស៊ីជុំគ្នាហើយ ក៏បន្តដំណើរទៅក្លឹបកម្សាន្ត ហើយហៅ គាត់មកចូលរួមជាមួយ ។ លោក យ៉ែម ខែមរ៉ាត បន្តថា ដោយរថយន្តរបស់គាត់មិនអាចបើកចេញបាន មានរថយន្តជាច្រើននៅពាំងជាប់ខាងក្រោយ ទើបសម្រេចចិត្តជិះឡានដែលចាប់បាននេះ ទៅចូលខារ៉ាអូខេជាមួយកូនចៅ ក៏កើតមានរឿងហេតុនេះ គឺឃើញនាយយោធាឈ្មោះ ថាន យុទ្ធឋាន ហៅគីម មិនដឹងជាមកពីកន្លែងណា ស្រាប់តែចូលមកក្នុងបន្ទប់ខារ៉ាអូខេ សួរនាំបានតែបន្តិច កើតជាអំពើហិង្សាតែម្តង ។
បើទោះជាមានការលើកឡើងពីមេគយច្រកអូររំដួលនេះក៏ដោយ មជ្ឈដ្ឋានទូទៅជាមួយនឹងមន្ត្រីអនុវត្តច្បាប់ចាត់ទុកថា ទាំងមន្ត្រីគយ និងមេគយគ្មានភាពទទួលខុសត្រូវក្នុងនាមជាមន្ត្រីអនុវត្តច្បាប់ ហើយការយករថយន្តជាវត្ថុតាងបទល្មើសទៅប្រើប្រាស់ដោយគ្មានការស្នើសុំពីថ្នាក់លើ ចាត់ទុកថា អំពើខុសច្បាប់ ហើយក៏ស្ថិតក្នុងភាពមិនថ្លៃថ្នូរ ធ្វើឲ្យប៉ះពាល់ទៅលើកិត្តិយសដ៏ខ្លាំងក្លានៃស្ថាប័នគយ ។ ជុំវិញបញ្ហានេះ គួរណាស់តែអគ្គនាយក នៃអគ្គនាយកដ្ឋានគយ និងរដ្ឋាករកម្ពុជាចាត់វិធានការតាមផ្នែករដ្ឋបាល ឬត្រូវដកតំណែង បន្ទាប់ពីមេគយ លោក យ៉ែម ខែមរ៉ាត មិនមែនកើតមាននូវអំពើមិនប្រក្រតីជាតំណែងមេគយច្រកអូររំដួលនេះជាលើកទីមួយនោះឡើយ ។ កន្លងទៅថ្នាក់លើក៏ត្រូវបានដកបញ្ឈរជើងជាប់ពាក់ព័ន្ធភាពមិនប្រក្រតីអំពើពុករលួយលើការដឹកនាំ ប៉ុន្តែបុគ្គលរូបនេះត្រូវបានមកកាន់តំណែងវិញទាំងប្រឈមការរិះគន់ មិនតែប៉ុណ្ណោះ ទំនិញគេចពន្ធត្រូវបានហូរចូលយ៉ាងតិចជិត៥០ភាគរយ ដែលមន្ត្រីទម្លាយថា បង់ពន្ធមិនគ្រប់ ក្នុងនោះ ថែមទាំងអនុញ្ញាតឲ្យរថយន្តដឹកទំនិញធុនធំពីប្រទេសថៃ ចូលមកកម្ពុជាខុសម៉ោងរដ្ឋបាល ដូចជាពេលយប់ និងពេលទៀបភ្លឺ នេះជាដើម ។ បញ្ហានេះ គេសង្ស័យថា ជាការដឹកជញ្ជូនទំនិញគេចពន្ធ ដែលធ្វើជាទម្លាប់អស់រយៈពេលជាច្រើនខែ តាំងពីលោកយ៉ែម ខែមរ៉ាត បានទៅកាន់តំណែងដដែលនេះវិញ ។
ពាក់ព័ន្ធនឹងការរិះគន់ខាងលើនេះ នគរវត្តមិនអាចទាក់ទងបានទេពីលោក យ៉ែម ខែមរ៉ាត ក៏ដូចជាលោក ប្រធានសាខាគយ និងរដ្ឋាករខេត្តបាត់ដំបងកាលពីព្រឹកថ្ងៃទី២៥ ខែកក្កដា ឆ្នាំ២០១៧ បន្ទាប់ពីរឿងអាស្រូវខាងលើនេះ ត្រូវបានគេលាតត្រដាងផ្សព្វផ្សាយ ជាមួយនឹងការរិះគន់ពេញបន្ទុក ។ មន្ត្រីគយដែលមិនពេញចិត្តនឹងទង្វើមិនគប្បីនេះក៏បានលើកឡើងផងដែរថា នេះមិនមែនជាលើកទី១ ដែលពួកគាត់យកវត្ថុតាងបទល្មើសទៅប្រើប្រាស់នោះទេ ប៉ុន្តែកន្លងមក មិនមានម្ចាស់រថយន្តណាគេមកតវ៉ា ចៃដន្យអីលើកនេះ នាយយោធាមួយរូបខាងលើ គាត់តូចចិត្តនឹងអំពើមិនប្រក្រតីនេះ ទើបកើតជាកំហឹងទល់កំហល់ ប្រើអំពើហិង្សាក្លាយទៅជារឿងអាម៉ាស់នៃអង្គភាពទាំងពីរ ដែលសុទ្ធតែជាមន្ត្រីអនុវត្តច្បាប់ ហើយនាំគ្នាបំពាននឹងផ្លូវច្បាប់ អ្នកមានតួនាទីចាប់ យកវត្ថុតាងទៅប្រើប្រាស់ ហើយអ្នកមានតួនាទីអនុវត្តច្បាប់ នាំរថយន្តគេចពន្ធចូល ក៏ដូចជាការប្រើហិង្សានេះជាដើម ៕ សុខ ខេមរ៉ា
