សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ កម្លាំងនគរបាលប៉ុស្តិ៍រដ្ឋបាលឃុំស្វាយលើ ស្រុកស្វាយលើ បានសហការជាមួយមេភូមិខ្ទះ ចុះត្រួតពិនិត្យគ្រាប់យុទ្ធភ័ណ្ឌមិនទាន់ផ្ទុះដែលសល់ពីសម័យសង្គ្រាមនៅក្នុងចំការប្រជាពលរដ្ន ចំនួន១១គ្រាប់យកមកប្រគល់ឱ្យអង្គការស៊ីម៉ាកកម្ទឹចចោល។
ហេតុការណ៍នេះបានធ្វើឡើង នៅថ្ងៃទី២៦ ខែកក្តដា ឆ្នាំ២០១៧ ស្ថិតនៅចំណុចត្រពាំងកន្សែង ក្នុងភូមិខ្ទះ ឃុំស្វាយលើ ស្រុកស្វាយលើ ខេត្តសៀមរាប។
តាមប្រភពពីសមត្ថកិច្ចនគរបាលជំនាញ បានប្រាប់ថា ដោយមានការចូលរួមពីកម្លាំងប៉ុស្តិ៍នគរបាលរដ្ឋបាលឃុំស្វាយលើ នៃអធិការដ្ឋាននគរបាលស្រុកស្វាយលើ បានសហការជាមួយលោក ឆោម ស្អាតសុផាន់ មេភូមិត្រពាំងខ្ទះ បានចុះទៅត្រួតពិនិត្យគ្រាប់យុទ្ធភ័ណ្ឌមិនទាន់ផ្ទុះ ក្នុងដីស្រែឈ្មោះ ឆន យឿន ភេទប្រុស អាយុ ៣២ ឆ្នាំ ទីលំនៅភូមិត្រពាំងស្វាយ ឃុំស្វាយលើ មានចំនួន១១គ្រាប់ ដែលមានចម្ងាយពីប៉ុស្តិ៍ស្វាយលើប្រហែល២១គីឡូម៉ែត្រ និង បានរាយការណ៍ជូនអង្គការស៊ីម៉ាក់ ដើម្បីប្រមូលយកទៅកម្ទេចចោល ។
សូមបញ្ជាក់ថា គ្រាប់យុទ្ធភ័ណ្ឌមិនទាន់ផ្ទុះទាំង១១គ្រាប់នោះ រួមមាន៖ គ្រាប់ប្រភេទ ៨០មីល្លីម៉ែត្រ ចំនួន ១គ្រាប់ ; គ្រាប់ប្រភេទ ៧៦ មីល្លីម៉ែត្រចំនួន១គ្រាប់ ; គ្រាប់ប្រភេទ ៦០ មីល្លីម៉ែត្រ ចំនួន ៨គ្រាប់ និងក្បាលគ្រាប់ប្រភេទ ៦០មីល្លីម៉ែត្រ ចំនួន ១គ្រាប់ ៕ ប៊ុន រិទ្ធី
