សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នាវេលាម៉ោង៩យប់ថ្ងៃទី២៣ ខែសីហា ឆ្នាំ២០១៧ តាមបណ្តោយផ្លូវ៥១ នៅចំណុចរង្វង់មូលវត្តភ្នំ ស្ថិតនៅក្នុងសង្កាត់វត្តភ្នំ ខណ្ឌដូនពេញ គណៈបញ្ជាការឯកភាពខណ្ឌដូនពេញបានចុះបង្រ្កាបសកម្មភាពស្ត្រីរកស៊ីផ្លូវភេទដែលឈរនៅរង្វង់មូលវត្តភ្នំដោយឃាត់ខ្លួនបានចំនួន៤នាក់យកទៅធ្វើការអប់រំ។
សមត្ថកិច្ចចម្រុះបានឲ្យដឹងថា ស្ត្រីរកស៊ីផ្លូវភេទដែលឃាត់ខ្លួននេះ ទី១-ឈ្មោះ ស.ជ.ត អាយុ២៨ឆ្នាំ ស្នាក់នៅមិនពិតប្រាកដ, ទី២-ឈ្មោះ ណ.រ អាយុ២៨ឆ្នាំ ស្នាក់នៅផ្ទះជួលបន្ទប់លេខ២ សង្កាត់ទួលសង្កែ ខណ្ឌឬស្សីកែវ, ទី៣-ឈ្មោះ ម.ដ.វ អាយុ៣៨ឆ្នាំ ស្នាក់នៅផ្សារចាស់ សង្កាត់ផ្សារចាស់ ខណ្ឌដូនពេញ និងទី៤-ឈ្មោះ ម.ស.ព អាយុ១៦ឆ្នាំ ស្នាក់នៅសង្កាត់ផ្សារចាស់ ខណ្ឌដូនពេញ ។កន្លងមកស្ត្រីរកស៊ីផ្លូវខាងលើនេះតែងតែលួចបន្លំលុយ ឬរបស់របរភ្ញៀវដែលមករកសេវាផ្លូវភេទនៅទីនេះ និងតែងបង្កភាពអសន្តិសុខ ឆក់ និងប្លន់ជាមួយបក្ខពួកជាជ្រើននាក់ទៀតនៅចំណុចរង្វង់មូលវត្តភ្នំ។ដុច្នេះហើយទើបលោក សុខ ពេញវុធ អភិបាលខណ្ឌដូនពេញបានបញ្ជាឱ្យកម្លាំងចម្រុះចុះឃាត់ខ្លួនស្ត្រីរកស៊ីផ្លូវភេទបានចំនួន៤នាក់នេះយកទៅសាលាខណ្ឌដូនពេញបំពេញបែបបទ បញ្ជូនទៅមន្ទីរសង្គមកិច្ចរាជធានីភ្នំពេញដើម្បីអប់រំ និង កែប្រែជីវភាពថ្មី ៕ ប្រាថ្នា
