សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាលៈ ជនសង្ស័យ៣នាក់ជិះម៉ូតូឌុបគ្នាធ្វើសកម្មភាពជួញដូរដោយខុសច្បាប់នូវសារធាតុញៀន ត្រូវបានសមត្ថកិច្ចនគរបាលស្រុកកោះធំចាប់ខ្លួន បញ្ជូនមកអធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមនីតិវិធីច្បាប់ កាលពីថ្ងៃអង្គារ ទី៣ ខែតុលា ឆ្នាំ២០១៧ វេលាម៉ោង១៧និង១០នាទីល្ងាច ត្រង់ចំណុចបរិវេណមន្ទីរពេទ្យបង្អែកស្រុកកោះធំ ស្ថិតក្នុងភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល ។
មន្រ្តីនគរបាលផ្នែកប្រឆាំងគ្រឿងញៀនស្រុកកោះធំបានឲ្យដឹងថា ជនសង្សូ័យ៣នាក់ចាប់ខ្លួនបាន ទី១- ឈ្មោះ ប៉ា កើក ភេទប្រុស អាយុ១៧ឆ្នាំ ជនជាតិខ្មែរឥស្លាម មុខរបរ នេសាទ ទី២-ឈ្មោះ សាន់ រីណា ភេទប្រុស អាយុ២៩ឆ្នាំ ជនជាតិខ្មែរឥស្លាម មុខរបរនេសាទ ។ ជនសង្ស័យទី១និងទី២មានទីលំនៅភូមិចាមលើ ឃុំព្រែកថ្មី ស្រុកកោះធំ ខេត្តកណ្ដាល ។ ចំណែកជនសង្ស័យទី៣-ឈ្មោះ សឹក សារ៉ាត់ ភេទប្រុស អាយុ២០ឆ្នាំ ជនជាតិខ្មែរឥស្លាម មុខរបរ លក់ដូរ មានទីលំនៅភូមិផ្សារជ្រែ ឃុំអង្កាញ់ ស្រុកព្រៃកប្បាស ខេត្តតាកែវ ។ ដោយឡែកវត្ថុតាងដកហូតបានមាន៖ ថ្នាំញៀនប្រភេទមេតំហ្វេតាមីនហៅម៉ាទឹកកកចំនួន២កញ្ចប់តូច ,ម៉ូតូចំនួន ១គ្រឿង ម៉ាកហុងដា Click ពណ៌ស បិទស្គុតពណ៌ខ្មៅ ពាក់ស្លាកលេខ តាកែវ 1J-8504 និងទូរស័ព្ទចំនួន ២គ្រឿងផងដែរ ។
ប្រភពពីសមត្ថកិច្ចបានឲ្យដឹងថា នៅមុនពេលកើតហេតុ កម្លាំងនគរបាលប៉ុស្ដិ៍រដ្ឋបាលព្រែកថ្មី បានចុះល្បាតក្នុងភូមិសាស្ត្រខ្លួនគ្រប់គ្រង ដើម្បីការពារ សន្តិសុខសណ្ដាប់ធ្នាប់ ជូនប្រជាពលរដ្ឋ ។ លុះនៅវេលាកើតហេតុខាងលើ ក៏បានទទួលព័ត៌មានច្បាស់ការថា មានក្រុមជនសង្ស័យ៣នាក់ កំពុងធ្វើសកម្មភាពចែកចាយជួញដូរគ្រឿងញៀន នៅចំណុចបរិវេណមន្ទីពេទ្យបង្អែកស្រុកកោះធំ ។ ក្រោយពីទទួលបានព័ត៌មានភ្លាម កម្លាំងសមត្ថកិច្ចប៉ុស្ដិ៍ សហការជាមួយកម្លាំងនគរបាលស្រុក ចុះស្រាវជ្រាវដល់ចំណុចកើតហេតុខាងលើ ក៏បានជួបមុខសញ្ញាសង្ស័យ ៣នាក់ជិះម៉ូតូ ភ្លាមនោះសមត្ថកិច្ចបានហៅឲ្យឈប់សុំត្រួតពិនិត្យនិងឆែកឆេរបានរកឃើញថ្នាំញៀនចំនួន២ កញ្ចប់តូច នៅជាប់ខ្លួន ជនសង្ស័យឈ្មោះ សាន់ រីណា ឈានដល់ចាប់ខ្លួនជនសង្ស័យទាំង៣នាក់ខាងលើ រួមនិងវត្ថុតាងជាក់ស្ដែង បញ្ជូនមកកាន់អធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ។
នៅចំពោះមុខសមត្ថកិច្ច ជនសង្ស័យ សាន់ រីណា បានឆ្លើយសារភាពថា ថ្នាំញៀនចំនួន២កញ្ចប់តូច ខាងលើនេះ ពិតជារបស់ខ្លួនប្រាកដមែន ដោយឈ្មោះ សា ប្រេះ ភេទប្រុស ជនជាតិខ្មែរឥស្លាម បានប្រើខ្លួនឲ្យយកទៅលក់បន្ត ៕ ស្អាងជ័យ
