សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍គ្រោះថ្នាក់មួយបណ្ដាលឲ្យបុរសម្នាក់ស្លាប់យ៉ាងអាណោចអាធ័ម ហើយរកបងប្អូនអត់ទាន់ឃើញទៀតផង ហេតុការណ៍នេះ កើតឡើងកាលពីវេលាម៉ោង៩និង៣០នាទីយប់ ថ្ងៃទី២ ខែវិច្ឆិកា ឆ្នាំ២០១៧ ស្ថិតតាមបណ្ដោយផ្លូវ៣៧១ ភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។
ជនរងគ្រោះមិនទានបានស្គាល់អត្ដសញ្ញាណនៅឡើយទេ ដោយគ្មានអ្វីដែលសម្គាល់ក្នុងខ្លួន ។
បើតាមសម្ដីប្រជាពលរដ្ឋបានប្រាប់ឲ្យដឹងថា មុនពេលកើតហេតុ គេបានឃើញបុរសម្នាក់ជិះម៉ូតូម៉ាក អាយខន ពណ៌លឿង ដែលពាក់ស្លាកលេខ កណ្ដាល1K-4016 ធ្វើដំណើរក្នុងទិសដៅពីលិចមកកើតក្នុងល្បឿនលឿន ស្រាប់តែមកដល់ចំណុចកើតហេតុ ក៏មានរថយន្ដកូរ៉េមួយគ្រឿង ដែលពាក់ស្លាកលេខ 2AL-7863 ធ្វើដំណើរបញ្ច្រាសទិសគ្នាពីកើតទៅលិចក្នុងល្បឿនលឿនដូចគ្នាហើយបានជែងជាមួយនិងអ្វីម្យ៉ាង ក៏ជ្រុលចង្កូតទៅបុកម៉ូតូពេញទំហឹងបណ្ដាលឲ្យម៉ូតូខ្ទាតទៅចិញ្ចើមផ្លូវបណ្ដាលឲ្យស្លាប់ពេលរថយន្ដសង្គ្រោះដឹកទៅដល់ពាក់កណ្ដាលផ្លូវតែម្ដង ។
ក្រោយពេលកើតហេតុ សមត្ថកិច្ចមូលដ្ឋានចុះមកដល់កន្លែងកើតហេតុ និងទាក់ទងទៅជំនាញចុះមកវាស់វែង និងអូសទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ ដើម្បីដោះស្រាយគ្នាពេលក្រោយ ដោយឡែក សាកសពជនរងគ្រោះយកទៅតម្កល់នៅវត្ដទឹកថ្លារង់ចាំការទំនាក់ទំនងពីក្រុមគ្រួសារយកទៅធ្វើបុណ្យតាមប្រពៃណី ៕ ភារ៉ា ដង្កោ
