សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៦នាក់ ត្រូវបានកម្លាំងសមត្ថកិច្ចប៉ុស្តិ៍នគរបាលទួលស្វាយព្រៃទី២ ឃាត់ខ្លួន ពីរករណីផ្សេងគ្នា បន្ទាប់ពីធ្វើតេស្តទឹកនោម មានសារធាតុញៀន។
ករណីទី១ កម្លាំងសមត្ថកិច្ចប៉ុស្តិ៍ទួលស្វាយព្រៃទី២ ឃាត់ខ្លួនជនសង្ស័យ០៤នាក់ ដែលប្រើប្រាស់នូវសារធាត់ញៀន ខុសច្បាប់ កាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី០៦ ខែវិច្ឆិកា ឆ្នាំ២០១៧ នៅតាមបណ្តោយផ្លូវលេខ២០៥ ក្រុម២៦ ភូមិ៦ សង្កាត់ទួលស្វាយព្រៃទី២ ខណ្ឌចំការមន។
ករណីទី២ ឃាត់ខ្លួនបានជនសង្ស័យចំនួន០២នាក់ កាលពីវេលាម៉ោង ០២រំលងអធ្រាត្រឈានចូលថ្ងៃទី៦ ខែតុលា ឆ្នាំ២០១៧ ស្ថិតនៅតាមបណ្ដោយផ្លូវលេខ២០៥ កែងផ្លូវលេខ៣៨៤ ភូមិ៦ ក្រុម៣០ សង្កាត់ទួលស្វាយព្រៃទី២ ខណ្ឌចំការមន បន្ទាប់ពីប្រើប្រាស់នូវសារធាត់ញៀនខុសច្បាប់។
ជនសង្ស័យទី១ មានឈ្មោះ សុឹម តា ភេទប្រុស អាយុ១៧ឆ្នាំ មុខរបរកម្មកសំណង់ ស្នាក់នៅផ្ទះគ្មានលេខ ផ្លូវលេខ៣៦៩ ខណ្ឌច្បារអំពៅ។ ជនសង្ស័យទី២ ឈ្មោះ ស្រឿន សុខនៅ ភេទប្រុស អាយុ១៨ឆ្នាំ មុខរបរកម្មករបេះផ្លែស្វាយ ស្នាក់នៅភូមិទួលទ្រា ឃុំព្រែកក្មេង ស្រុកល្វាឯម ខេត្តកណ្ដាល។ ជនសង្ស័យទី៣ ឈ្មោះ ឈុំ វិសិទ្ឋ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិបាក់ដាវក្រោម ឃុំបាត់ដាវ ស្រុកខ្សាច់កណ្ដាល ខេត្តកណ្ដាល។ ជនសង្ស័យទី៤ ឈ្មោះ ធឿន ប៊ុនថន ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅភូមិបាក់ដាវក្រោម ឃុំបាត់ដាវ ស្រុកខ្សាច់កណ្ដាល ខេត្តកណ្ដាល។ ជនសង្ស័យទី៥ ឈ្មោះ វិន ខេមរា ភេទប្រុស អាយុ១៦ឆ្នាំ មុខរបរកម្មករោងចក្រទឹកសុទ្ធ ស្នាក់នៅផ្ទះជួល ផ្លូវបេតុង សង្កាត់ស្ទឹងមានជ័យ ខណ្ឌមានជ័យ។ ជនសង្ស័យទី៦ ឈ្មោះ ឈឹង សុឡា ភេទប្រុស អាយុ១៨ឆ្នាំ មុខរបរលក់ប្រហិត ស្នាក់នៅផ្ទះជួល ផ្លូវបេតុង សង្កាត់ដង្កោ ខណ្ឌដង្កោ។
ប្រភពព័ត៌មានពីមន្ត្រីសមត្ថកិច្ចបានអោយដឹងថាមុនឃាត់ខ្លួនជនសង្ស័យទាំង៦នាក់ កម្លាំងសមត្ថកិច្ចប៉ុស្តិ៍ទួលស្វាយព្រៃទី២ល្បាត់ក្នុងមូលដ្ឋានដូចសព្វដងក៏ប្រទះជនសង្ស័យ៤នាក់ ឈររេរា នៅតាមបណ្ដោយផ្លូវលេខ២០៥ ដោយមានការសង្ស័យ ក៏ឃាត់ខ្លួនជនសង្ស័យទាំង ៤នាក់យកមកអធិការរដ្ឋាននគរបាលខណ្ឌចំការមនដើម្បីធ្វើតេស្តទឹកនោម។
ចំណែកជនសង្ស័យពីរនាក់ទៀត ជិះម៉ូតូមួយគ្រឿងម៉ាក និច ពណ៌ស គ្មានស្លាក់លេខ ឃាត់ខ្លួននៅក្បែរហាងបញ្ចាំមួយកន្លែង នៅតាមបណ្ដោយផ្លូវលេខ២០៥ កែងផ្លូវលេខ៣៨៤ ភូមិ៦ ក្រុម៣០ សង្កាត់ទួលស្វាយព្រៃទី២ ខណ្ឌចំការមន ។
សរុបទាំងពីរករណីឃាត់ខ្លួនបានជនសង្ស័យ៦នាក់រួមនឹងម៉ូតូមួយគ្រឿងម៉ាក ស៊ូស៊ុយគី និច ពណ៌ស គ្មានស្លាកលេខ។
បច្ចុប្បន្នជនសង្ស័យទាំង៦នាក់ខាងលើ រួមនឹងវត្ថុតាងត្រូវបានសមត្ថកិច្ចឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងចាត់ ការតាមច្បាប់បន្តទៀត៕ ស រស្មី
