ខឹងប្រពន្ធមិនឲ្យជក់គ្រឿងញៀនក្នុងផ្ទះ ទិញសាំងកន្លះលីត្រដុតផ្ទះ ឆេះរត់ផ្អើលសមត្ថកិច្ចចាប់ឃាត់ខ្លួន

ភ្នំពេញ៖ បុរស២នាក់ បាននាំគ្នាសំងំជក់គ្រឿងញៀននៅក្នុងផ្ទះ ពេលប្រពន្ធមកទាន់ដេញចេញក្រៅផ្ទះ ធ្វើជនសង្ស័យទាំង២នាក់ខឹង បាននាំគ្នារត់ទៅទិញសាំងកន្លះលីត្រច្រក្នុងដបទឹកសុទ្ធ ដោយរុំក្រណាត់គប់ចូលក្នុងផ្ទះ ឆេះហ៊ុយផ្សែងត្រលោមផ្អើលសមត្ថកិច្ចចាប់ឃាត់ខ្លួនទាំង២នាក់ ។

ករណីខាងលើនេះ បានកើតឡើងកាលពីវេលាម៉ោង៤និង៣០នាទីរសៀលថ្ងៃទី២៤ ខែវិច្ឆិកា  ឆ្នាំ២០១៧ នៅចំណុចផ្ទះលេខ១៩ក៤ ក្រុម២០៨ ផ្លូវជាតិលេខ៥ សង្កាត់ស្រះចក ខណ្ឌដូនពេញ ។

ជនរងគ្រោះឈ្មោះ ប៊ួយ ឌិន ភេទស្រី អាយុ២៩ឆ្នាំ ស្នាក់នៅផ្ទះជួលកើតហេតុខាងលើ ដោយម្ចាស់ផ្ទះឈ្មោះសុខ សាវឿន ភេទស្រី អាយុ៥៩ឆ្នាំ ។ចំណែកជនសង្ស័យទាំង២នាក់ ដែលសមត្ថកិច្ចឃាត់ខ្លួនទី១ ឈ្មោះឡឹម យុំាងង៉ុក ភេទប្រុស អាយុ២៧ឆ្នាំ និងទី២ ឈ្មោះ សួន សុជាតិ ហៅវ៉េវ ភេទប្រុស អាយុ២៤ឆ្នាំ អ្នកទាំង២ជាជនជាតិវៀតណាម ។

តាមប្រភពព័ត៍មានពីនគរបាលខណ្ឌដូនពេញ បានឲ្យដឹងថា មុនពេលកើតហេតុ នៅវេលាម៉ោង៤និង៣០នាទីរសៀលថ្ងៃទី២៤ ខែវិច្ឆិកា ពេលប្រពន្ធជនសង្ស័យឈ្មោះឡឹម យុំាងង៉ុក មិននៅផ្ទះពេលនោះរូបគេបានហៅឈ្មោះសួន សុជាតិ ហៅវ៉េវ មកឡើងលើផ្ទះដើម្បីជក់គ្រឿងញៀន ពេលកំពុងតែជក់ ស្រាប់តែភ្លាមនោះស្រ្តីជាប្រពន្ធបានត្រលប់មកផ្ទះវិញ ឃើញប្តីនិងមិត្តភក្តិកំពុងជក់ ក៏បានដេញចេញឲ្យទៅក្រៅផ្ទះ ហើយជនសង្ស័យបានបោះពាក្យសម្តីថា បើរូបគេមិនបាននៅផ្ទះនេះ ង៉ែងក៏មិនបាននៅដែល ។ពេលនិយាយរួចក៏ចេញទៅបាត់មួយសន្ទុះ ស្រាប់តែដើរមកវិញឃើញមានកាន់ដបទឹកសុទ្ធកន្លះលីត្រ ប៉ុន្តែច្រកសាំងចូលនិងមានរុំក្រណាត់ចូលដប រួចធ្វើសកម្មភាពគប់ចូលទៅក្នុងផ្ទះ ឆេះហ៊ុយផ្សែងត្រលោមបង្កឲ្យមានការភ្ញាក់ដល់ប្រជាពលរដ្ឋជិតខាង នាំគ្នាជួយធ្វើអន្តរគមន៍ពន្លត់ទាន់ពេលវេលា ភ្លាមនោះសមត្ថកិច្ចមកដល់បានចាប់ឃាត់ខ្លួនទាំង២នាក់ បញ្ចូនមកសាកសួរនៅនគរបាលប៉ុស្តិ៍ស្រះចក ដើម្បីធ្វើការសាកសួរ ចំណែកសម្ភារខូចខាតឆេះគំរាលក្រាលកៅស៊ូលើក្តាផ្ទះបន្តិចបន្តួច ។

បច្ចុប្បន្នជនសង្ស័យទាំង២នាក់ ត្រូវបានបញ្ជូនទៅអធិការនគរបាលខណ្ឌដូនពេញដើម្បីចាត់ការតាមនីតិវិធី ៕ស តារា