សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវសិស្ស២នាក់ បានបែកគំនិតធ្វើសកម្មភាពឆក់កាបូបស្ពាយ ពីនារីម្នាក់បានសម្រេចហើយព្យាយាមជិះរត់គេចខ្លួន ប៉ុន្តែត្រូវកម្លាំងនគរបាលប៉ុស្តិ៍បឹងកក់ទី១ ធ្វើការឃាត់ខ្លួន កាលពីវេលាម៉ោង៨និង៤០នាទីព្រឹក ថ្ងៃទី២៧ ខែវិច្ឆិកា ឆ្នាំ២០១៧ នៅត្រង់ចំណុចនៅមុខផ្ទះលេខ១៩៥២៨ ក្រុម២៥ ភូមិ៧ សង្កាត់បឹងកក់ទី១ ខណ្ឌទួលគោក ។
ប្រភពព័ត៌មានពីសមត្ថកិច្ច បានឲ្យដឹងថា ជនរងគ្រោះមានឈ្មោះ ហេង ជូឡេង ភេទស្រី អាយុ២៥ មុខរបរបបុគ្គលិកក្រុមហ៊ុនឯកជន ស្នាក់នៅផ្ទះលេខ៩៨៧ ផ្លូវលំ សង្កាត់ស្ទឹងមានជ័យ ខណ្ឌមានជ័យ ។រីឯជនសង្ស័យទាំង២នាក់ទី១ឈ្មោះ ទី១ឈ្មោះ ឡុង អៀង ភេទប្រុស អាយុ១៦ ជាសិស្ស ស្នាក់នៅម្ដុំសំរោងអណ្ដែត ; ទី២ឈ្មោះ ហេង សុភ័ត្រា ភេទប្រុស អាយុ ១៥ ជាសិស្ស ស្នាក់នៅផ្ទះម្ដុំផ្សារសំហាន់ សង្កាត់ទួលសង្កែ ខណ្ឌឬស្សីកែវ ។
សមត្ថកិច្ច បានបន្តទៀតថា មុនពេលកើតហេតុជនរងគ្រោះមានគ្នាពីរនាក់ជិះម៉ូតូឌុបគ្នា តាមផ្លូវលេខ៥២៨លុះជិះមកដល់ចំណុចកើតហេតុ ស្រាប់មានជនសង្ស័យ២នាក់ជិះម៉ូតូម៉ាកស៊ុយស៊ីគី និក ពណ៌ស ស្លាកលេខ ភ្នំពេញ 1GH 1138 មកពីក្រោយជនរងគ្រោះ រួចធ្វើសកម្មភាពឆក់កាបូបស្ពាយចំហៀងពីនារីរងគ្រោះបានសម្រេច ហើយជនសង្ស័យព្យាយាមជិះរត់គេចខ្លួន តែត្រូវអ្នកឃើញហេតុការណ៌បើករថយន្តកៀរផ្ដួលម៉ូតូរបស់ជនសង្ស័យតែត្រូវសមត្ថកិច្ចធ្វើការឃាត់ខ្លួនភ្លាមៗយកទៅកាន់ប៉ុស្តិ៍នគរបាលបឹងកក់ទី១ ដើម្បីសាកសួរផងដែរ ។
ក្រោយពេលកើតហេតុជនរងគ្រោះបានទៅដាក់ពាក្យបណ្ដឹងនៅប៉ុស្ដិ៍នគរបាលបឹងកក់ទី១ និងកាបូបនារីរងគ្រោះត្រូវសមត្ថកិច្ចប្រគល់អោយជនរងគ្រោះវិញ។
បច្ចុប្បន្នជនសង្ស័យត្រូវសមត្ថកិច្ចនាំខ្លួនកសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោក ដើម្បីចាត់ការបន្តតាមនិតិវិធីច្បាប់ ៕ស តារា
