សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ក្រោយមានជម្លោះពាក្យសម្ដីរហូតឈានដល់ការវាយតប់ទៅវិញទៅមក នៅក្នុងផ្សារតាខ្មៅចាស់ ក្រុងតាខ្មៅ ភាគីទាំងសងខាងបានចោទប្រកាន់គ្នាទៅវិញទៅមក ។ ប៉ុន្តែទីបំផុត ករណីនេះ ត្រូវបានបញ្ចប់ត្រឹមអធិការដ្ឋាននគរបាលក្រុងតាខ្មៅ តែសំណុំរឿងនឹងបញ្ជូនទៅអយ្យការអមសាលាដំបូងខេត្តកណ្ដាល ចាត់ការបន្តតាមនីតិវិធី ។
ភាគីឈ្មោះ ផេង បូរិន ភេទស្រី អាយុ៣០ឆ្នាំ មុខរបរលក់បន្លែ នៅថ្ងៃទី៣០ ខែវិច្ឆិកា អះអាងថា រូបគេពុំបានបង្កជម្លោះមុនទេ គឺ ឈ្មោះ យ៉េត ណារិន ជាអ្នកបង្កមុន ហើយកាឡៃថាខ្លួនជាអ្នកបង្កទៅវិញ។
សាក្សីនៅកន្លែងកើតហេតុ ឈ្មោះ អ៊ិន ស្រីមុំ ភេទស្រី អាយុ៥៩ឆ្នាំ និយាយថា កន្លងមក ភាគីឈ្មោះ ផេង បូរិន និង ឈ្មោះ យ៉េត ណារិន គឺ ធ្លាប់មានទំនាស់នឹងគ្នា ។ នៅយប់កើតហេតុ ឃើញប្រពន្ធឈ្មោះ យ៉េត ណារិន ស្ទុះវៃឈ្មោះ ផេង បូរិន មុន ។ ក្រោយមក ទើបខាងប្តីៗទាំងពីរនាក់វៃគ្នា ហើយបានឃើញឈ្មោះ យ៉េត ណារិន ទាញដែកថ្នាំងអំពៅ រកវៃគេ តែត្រូវបានគេចាប់ជាប់ ។ឈ្មោះ ផេង បូរិន សុំឱ្យស្ថាប័នពាក់ព័ន្ធរកយុត្តិធម៌ជូនពួកគេផង ។
ប្រភពព័ត៌មានពីនគរបាលក្រុងតាខ្មៅ បានឱ្យដឹងថា ស្ត្រីជាប្រពន្ធឈ្មោះ យ៉េត ណារិន ដែលសម្រាកព្យាបាលនៅមន្ទីរពេទ្យមានលក្ខណៈធ្ងន់ធ្ងរ គឺ ពុំមែនបណ្ដាលមកពីភាគី ផេង បូរិន វៃនោះទេ គឺ ប្រពន្ធឈ្មោះ យ៉េត ណារិន ទើបទម្លាក់កូនបានមួយខែ ទើបមានជំងឺហាក់ដូចធ្ងន់ធ្ងរបែបនេះ ។
គួររំលឹកថា កាលពីយប់ថ្ងៃទី២៨ ខែវិច្ឆិកា មានករណីហិង្សាមួយ នៅចំណុចផ្សារតាខ្មៅចាស់ ភូមិតាខ្មៅ សង្កាត់តាខ្មៅ ក្រុងតាខ្មៅ ដោយសមត្ថកិច្ចសម្រេចឃាត់ខ្លួនបុរសម្នាក់ឈ្មោះ យ៉េត ណារិន អាយុ៣៦ឆ្នាំ មុខរបរលក់គ្រឿងសមុទ្រ ដោយចោទប្រកាន់ពីបទហិង្សាដោយចេតនា ។
សាក្សីឃើញហេតុការណ៍ផ្ទាល់សុំមិនបញ្ចេញឈ្មោះ អះអាងថា ករណីនេះ គឺ ផ្តើមពីទំនាស់ពាក្យសម្ដីជាយូរមកហើយ ដោយមានការគុំកួនគ្នា ។ លុះយប់កើតហេតុ ខាងស្រីៗឈ្លោះប្រកែកគ្នារហូតផ្ទុះហិង្សាទៅវិញទៅមក ទើបភាគីខាងប្រុសចូលជួយឃាត់ ។
សមត្ថកិច្ចអះអាងថា បុរសឈ្មោះ យ៉េត ណារិន បានយកដែកថ្នាំងអំពៅ វាយទៅលើភាគីម្ខាងទៀត ។ ចំណុចនេះ បងស្រីរបស់ឈ្មោះ យ៉េត ណារិន បញ្ជាក់ថា ប្អូនប្រុសពុំបានវាយទេ តែភាគីម្ខាងទៀតទៅវិញទេដែលវាយ ប្អូនថ្លៃស្រីដែលត្រូវជាប្រពន្ធរបស់ឈ្មោះ យ៉េត ណារិន រងរបួសធ្ងន់កំពុងដេកសម្រាកនៅមន្ទីរពេទ្យ ៕ ឆ ដា
