ម៉ូតូ២គ្រឿងបុកគ្នាពេញទំហឺងរបួសធ្ងន់ប្រុសស្រី២នាក់

ខេត្តស្វាយរៀង៖ ប្រុសស្រី២នាក់ បានរងរបួសធ្ងន់ ដោយសារករណីគ្រោះថ្នាក់ចរាចរណ៍ ខណៈជិះម៉ូតូជែងរថយន្តទៅបុកនឹងម៉ូតូបញ្ច្រសគ្នាពេញទំហឺងលាន់សូរដូចរន្ទះលើផ្លួវគ្រួសក្រហម ចំណែកម៉ូតូខូចខាតទាំងស្រុងបង្កឲ្យមានការភ្ញាក់ផ្អើលដល់អ្នកធ្វើដំណើរ និងអ្នកភូមិកាលពីវេលាម៉ោង៧ព្រឹក ថ្ងៃទី២ ខែធ្នូ ឆ្នាំ២០១៧ ស្ថិតនៅចំណុចភូមិស្វាយតាយាន ឃុំស្វាយតាយាន ស្រុកកំពង់រោទ៍ ខេត្តស្វាយរៀង ។

សមត្ថកិច្ចនគរបាលឃុំស្វាយតាយានបានប្រាប់កាសែតនគរវត្តថា អ្នកបើកម៉ូតូហុងដាសេ១០០ ពណ៌ក្រហមពាក់ស្លាកលេខសេរីចាស់ ភព១ ៣៤៥២ មានឈ្មោះឃឹម រីណា ភេទស្រី អាយុ៣២ឆ្នាំ មុខរបរកសិករ មានទីលំនៅភូមិព្រៃតាយឹង ឃុំប្រសូត្រ ស្រុកស្វាយទាប ត្រូវបានដឹកយកទៅសង្គ្រោះនៅមន្ទីរពេទ្យភ្លាមៗ។

ចំណែកភាគីម្ខាងទៀត មានឈ្មោះឆាយ សារ៉ូត អាយុ៣៤ឆ្នាំ មុខរបរកសិករ ចន្ត្រី ឃុំចន្ត្រីស្រុក រមាសហែក ដោយជិះម៉ូតូម៉ាកហុងដាសេ ១២៥ ពណ៌ខ្មៅ ពាក់ស្លាកលេខ ស្វាយរៀង ១D៩០៧៨ ខូចខាតផ្នែកខាងមុខទាំងស្រុង។

បើតាមសាក្សីបានប្រាប់ថា មុនកើតហេតុ គេឃើញស្ត្រីម្នាក់បានជិះម៉ូតូហុងដាសេ១០០ពណ៌ក្រហមមួយគ្រឿងតែម្នាក់ឯង ដោយធ្វើដំណើរពីត្បូងមកជើង លើផ្លូវក្រាលក្រួសក្រហមយ៉ាងលឿន ហើយក៏បានជែងនឹងរថយន្តមួយគ្រឿងដែលបើកស្របគ្នា ខណៈនោះ ស្រាប់តែទៅបុកម៉ូតូហុងដាសេ១២៥មួយគ្រឿង ជិះម្នាក់ឯងពីជើងមកត្បូង បញ្ច្រសគ្នាពេញទំហឺងលាន់សូរប្រ៉ាវបង្កការភ្ញាក់ផ្អើលតែម្ដង។

ក្រោយមក ប្រជាពលរដ្ឋបានរាយការណ៍មកសមត្ថកិច្ចមូលដ្ឋានមកយកភាគីទាំងសងខាងមកកាន់មន្ទីរពេទ្យព្រមទាំងវាស់វែងរកខុសត្រូវ និងអូសម៉ូតូទាំង២គ្រឿងមកកាន់ប៉ុស្តិ៍នគរបាលឃុំស្វាយតាយាន ចាត់ការបន្តតាមច្បាប់ ៕ យឹម សុថាន