សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ត្រូវកម្លាំងនគរបាលប៉ុស្តិ៍ស្រះចកឃាត់ខ្លួន បន្ទាប់ពីពួកគេបានធ្វើសកម្មភាពលួចកាច់កម៉ូតូមួយគ្រឿងនៅខណ្ឌមានជ័យបានសម្រេចហើយ ព្យាយាមជិះរត់គេចខ្លួន ក៏ប្រទះជាមួយកម្លាំងល្បាតប៉ុស្ដិ៍ ឃើញម៉ូតូ និងភិនភាគជនសង្ស័យ ក៏ជិះដេញតាមឃាត់ខ្លួនបានទាំង២នាក់តែម្តង ។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង៧យប់ ថ្ងៃទី៤ ខែធ្នូ ឆ្នាំ២០១៧ នៅតាមបណ្តោយផ្លូវសហព័ន្ធរុស្ស៊ី សង្កាត់ស្រះចក ខណ្ឌដូនពេញ ។
ជនសង្ស័យទាំង២នាក់នេះ ទី១.ឈ្មោះ រស់ ណារ៉ុង អាយុ១៩ឆ្នាំ ស្នាក់នៅផ្ទះជួលជិតសាលាកសិកម្ម ក្នុងសង្កាត់ស្ទឹងមានជ័យ១ ខណ្ឌមានជ័យ ទី២.ឈ្មោះ សេង រស្មី អាយុ២១ឆ្នាំ មុខរបររត់ម៉ូតូឌុប មានទីលំនៅផ្ទះជួល ស្ថិតនៅក្នុងសង្កាត់ទួលសង្កែ ខណ្ឌឫស្សីកែវ។
វត្ថុតាងចាប់យកពីជនសង្ស័យមានម៉ូតូមួយគ្រឿងម៉ាកស៊ុយហ្សុ៊គីឡេត ពណ៌ស ពាក់ស្លាកលេខ ភ្នំពេញ 1FI-2728 ។ ដោយជនរងគ្រោះជាម្ចាស់ម៉ូតូឈ្មោះ ជា ប៊ុនណា ភេទស្រី អាយុ២៣ឆ្នាំ មានទីលំនៅផ្ទះជួលគ្មានលេខ ក្នុងសង្កាត់ស្ទឹងមានជ័យ ខណ្ឌមានជ័យ ។
តាមប្រភពពីមន្រ្តីនគរបាលប៉ុស្តិ៍ស្រះចក បានឲ្យដឹងថា មុនពេលកើតហេតុ នារីរងគ្រោះបានជិះម៉ូតូទៅផ្ទះបងប្រុសនៅម្ដុំផ្ទះជួលជិតផ្សារសូឡា ដោយទុកម៉ូតូនៅក្រោមផ្ទះ ហើយនាងបានឡើងទៅលើ។ លុះពេលចុះមកក្រោមវិញ ក៏ស្រាប់តែបាត់ម៉ូតូ រួចបានស្រែកផ្អើលឆោឡោតែម្តង ។ ភ្លាមៗនោះដែរនារីរងគ្រោះក៏បានសុំឲ្យម្ចាស់ផ្ទះឆែកមើលតាមកាមេរាសុវត្ថិភាព ឃើញជនសង្ស័យទាំង២នាក់ខាងលើកាច់កយកទៅ ហើយក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្ទឹងមានជ័យ ដើម្បីឲ្យសមត្ថកិច្ចជួយអន្តរាគមន៍តាមចាប់ជនសង្ស័យផងដែរ ។
ក្រោយទទួលបានពាក្យបណ្តឹងភ្លាម សមត្ថកិច្ចក៏បានផ្តល់ព័ត៌មានទៅតាមបណ្តាលខណ្ឌទាំង១២ ស្រាប់តែមួយស្ទុះក្រោយមក មន្ត្រីនគរបាលប៉ុស្តិ៍ស្រះចក ខណ្ឌដូនពេញ ចេញល្បាត ក៏បានប្រទះឃើញម៉ូតូ និងភិនភាគជនសង្ស័យ ក៏ជិះដេញតាមឃាត់ខ្លួនបានទាំង២នាក់តែម្តង។
បច្ចុប្បន្នទាំង២នាក់កំពុងសាកសួរ និងធ្វើកំណត់ហេតុនៅនគរបាលប៉ុស្តិ៍រដ្ឋបាលស្រះចក ដើម្បីចាត់ការតាមនីតិវិធី ។ ចំណែកម៉ូតូត្រូវបានសមត្ថកិច្ចប្រគល់ឲ្យនារីរងគ្រោះដោយផ្ទៀងផ្ទាត់ឯកសារ រួចប្រគល់ឲ្យវិញផងដែរ ៕ អរុណរះ
