ភ្នំពេញ៖ កូនប្រុសរដ្ឋលេខាធិការក្រសួងទំនាក់ទំនងរដ្ឋសភា ព្រឹទ្ធសភា និង អធិការកិច្ច នៅថ្ងៃពុធ ៣រោច ឆ្នាំរកា នព្វស័ក ពុទ្ធស័ករាជ២៥៦១ ត្រូវនឹងថ្ងៃទី០៦ ខែធ្នូ ឆ្នាំ២០១៧នេះ ត្រូវបានលោកហ៊ឹង ប៊ុនថន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចោទប្រកាន់ ពាក់ព័ន្ធការបាញ់បណ្តាលឱ្យបុរសម្នាក់របួសធ្ងន់នៅមជ្ឈមណ្ឌលកម្សាន្តរ៉ុក ។ រីឯបក្ខពួកពីរនាក់ទៀត ត្រូវបានបញ្ជូនទៅពន្ធនាគារ ។
មន្ត្រីតុលាការ បញ្ជាក់ថា កូនប្រុសរដ្ឋលេខាធិការក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច រូបនេះឈ្មោះ ឌុច សុវណ្ណារ៉េត ហៅ រិទ្ធញាញ់ កំពុងរត់គេចខ្លួន និង បក្ខពួកពីរនាក់ទៀតឈ្មោះ កែវ ភិរម្យ និង ឈ្មោះ ឡ ពេជ្រសីលា ត្រូវបានចោទប្រកាន់ពីបទ”ហិង្សាដោយចេតនាមានស្ថានទម្ងន់ទោស”តាមមាត្រា២១៨នៃក្រមព្រហ្មទណ្ឌ ។
គួររំលឹកថា កាលពីវេលាទៀបភ្លឺថ្ងៃទី២៩ ខែវិច្ឆិកា ឆ្នាំ២០១៧ មានករណីបាញ់ប្រហារមួយ នៅក្នុងបន្ទប់ខារ៉ាអូខេ នៃមជ្ឈមណ្ឌលកម្សាន្តរ៉ុក ស្ថិតនៅសង្កាត់បឹងត្របែក ខណ្ឌចំការមន រាជធានីភ្នំពេញ បណ្ដាលឱ្យជនរងគ្រោះម្នាក់រងរបួសធ្ងន់ ហើយសម្រាកព្យាបាលនៅមន្ទីរពេទ្យរុស្ស៊ី។
សមត្ថកិច្ចបាននិយាយថា ជនបង្កឈ្មោះ ឌុច សុវណ្ណារ៉េត ហៅ រិទ្ធញាញ់ជាកូនប្រុសរបស់ លោក ឌុច សុវណ្ណារី រដ្ឋលេខាធិការក្រសួងទំនាក់ទំនងរដ្ឋសភា-ពរឹទ្ធសភា និងអធិការកិច្ច។ ចំណែកជនរងគ្រោះឈ្មោះ បៀ សំអឿន អាយុជាង៣០ឆ្នាំ ជា Dj ប្រចាំមជ្ឈមណ្ឌលកម្សាន្ដ Rock ដែលត្រូវរបួសត្រូវកំភួនជើង និងគូទ ក្រោយពីជនដៃដល់បាញ់ចំនួន៤គ្រាប់។
ក្រោយកើតហេតុនេះ នៅថ្ងៃទី០១ខែធ្នូ ឆ្នាំ២០១៧ សមត្ថកិច្ចបានចាប់ខ្លួន បក្ខពួកជនដៃដល់២នាក់ ដែលបានរត់គេចខ្លួន ដល់ខេត្តកំពង់ធំ ខណៈដែលជនដៃដល់ក្នុងការបាញ់ប្រហារនេះ នៅមិនទាន់ចាប់ខ្លួន បាននៅឡើយទេ រហូតមកដល់ពេលនេះ៕ ចេស្តា
សារព័ត៌មាន នគរវត្ត តែងតែនាំមុខគេជានិច្ច
