សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ លោកវរសេនីយ៍ទោភុល ភស្តា អធិការ នគរបាលក្រុងព្រះសីហនុ បានឲ្យដឹងថា៖ នៅវេលាម៉ោងប្រមាណ២២ ថ្ងៃព្រហស្បតិ៍ ៤រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៧ ខែធ្នូ ឆ្នាំ២០១៧ កន្លងទៅនេះ មានជនទំនើង៤នាក់ បានប្រព្រឹត្តអំពើហិង្សា ដោយជិះម៉ូតូទៅដោះយកមួក ប្រជាពលរដ្ឋដែលកំពុងជិះម៉ូតូតាមផ្លូវ ពេលជនរងគ្រោះសួរនាំ ស្រាប់តែ ដកកាំបិត កាប់ទៅលើ ជនរងគ្រោះតែម្តង បណ្តាលឲ្យរងរបួសបែកចិញ្ចើម ចូលដេកពេទ្យ។ ទីកន្លែងកើតហេតុ នៅជិតស្ថានីយប្រេងសូគីមិច ស្ថិតក្នុងក្រុមទី១១ ភូមិ២ សង្កាត់លេខ៤ ក្រុងព្រះសីហនុ។
លោកភុល ភស្តា អធិការ នគរបាលក្រុង បានបញ្ជាក់ថា៖ ក្រោយពេលទទួលដំណឹងនេះភ្លាម សមត្ថកិច្ចបានចុះអន្តរាគមន៍ ចាប់ខ្លួនជនទំនើងបានចំនួន៣នាក់៖ ១. ឈ្មោះ ឯម ធឿន ហៅជា ភេទប្រុស អាយុ១៧ឆ្នាំ មុខរបមិនពិតប្រាកដ ទីលំនៅបច្ចុប្បន្នរស់នៅភូមិដូងក្រុមទី២១ ភូមិ១ សង្កាត់លេខ៤ក្រុង-ខេត្តព្រះសីហនុ ជាជនដៃដល់កាប់ទៅលើជនរងគ្រោះ(មានកាំបិតចែត ) តាមចម្លីយសារភាពពីជនសង្ស័យរូបនេះបានអោយដឹងថាៈ ធ្លាប់ធ្វើសកម្មភាពកាប់គ្នាជាមួយក្រុម K.Boy នៅកន្ទុយនាគម្តងក្នុងអំឡុងខែតុលា ឆ្នាំ២០១៧ ជាមួយឈ្មោះ ចេក ,ឈ្មោះ លី,ឈ្មោះ ឆែប បណ្តាលអោយរងរបួសទាំងសងខាង និង បានវ៉ៃគេម្តងនៅប៉ុន្មានថ្ងៃមុន (មិនចាំថ្ងៃក្នុងខែធ្នូ ឆ្នាំ២០១៧ នៅភូមិដូង) គឺជាមុខសញ្ញាជនទំនើង អុកឡុកក្នុងមូលដ្ឋានជាញឹកញ៉ាប់។ ២ ឈ្មោះ សេន ចាន់ណា ហៅញ៉ាញ់ ភេទប្រុស អាយុ១៧ ឆ្នាំ មុខរបរជាងផ្សារដែក បច្ចុប្បន្នរស់នៅភូមិដូងក្រុមទី២១ ភូមិ១ សង្កាត់លេខ៤ ក្រុង/ខេត្តព្រះសីហនុ ជាអ្នកបើកម៉ូតូ (ម៉ាកអ៊ែប្លែត ពណ៌ខ្មៅ ) ។ ៣.ឈ្មោះ ឆន សង្ហា ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅភូមិដូង សង្កាត់លេខ៤ ក្រុងព្រះសីហនុ ជាបក្សពួកក្នុងការដឹកជនសង្ស័យដើររកវ៉ៃជនរងគ្រោះ មានម៉ូតូសង់ សេរីឆ្នាំ២០១៤ ។
រីឯគ្នីគ្នាម្នាក់ទៀត ឈ្មោះ លី ភេទប្រុស អាយុប្រហែល១៩ ឆ្នាំ ជាម្ចាស់ម៉ូតូសង់ប៊ិច (រត់គេចខ្លួន)។
សមត្ថកិច្ចបានចាប់យក៖ ម៉ូតូម៉ាកអ៊ែប្លែត ពណ៌ខ្មៅ សេរីឆ្នាំ២០១៤ លេខតួ និងម៉ាស៊ីនRLHJ4G10iz 406909, ម៉ូតូម៉ាកHONDA.C125 សេរីឆ្នាំ២០១៤ ពណ៌ខ្មៅ ពាក់ស្លាកលេខ ព្រះសីហនុ1C.0403 លេខតួ-ម៉ាស៊ីន ND125ME8466755 និង ម៉ូតូម៉ាកសង់ប៊ិច HONDA C125 (កាំបន្ទះពណ៌ខ្មៅ) លេខតួ ម៉ាស៊ីន 3006147 ពាក់ស្លាកលេខ ស្វាយរៀង 1D.0105។
ជនរងគ្រោះឈ្មោះ ជ្រឹម មករា ភេទប្រុស អាយុ២១ឆ្នាំ មុខរបរជាងផ្សារដែក បច្ចុប្បន្នរស់នៅម្តុំសេតេ ភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ ( រងរបួសលើចិញ្ចើមខាងស្តាំ ) កំពុងសំរាកព្យាបាលនៅមន្ទីរពេទ្យបង្អែកខេត្តព្រះសីហនុ។
ជនសង្ស័យ ទាំង៣ សមត្ថកិច្ចបានធ្វើការឃាត់ខ្លួននៅអធិការដ្ឋាននគរបាលក្រុង ដេីម្បីកសាងសំណុំរឿងបញ្ជូនទៅការិយាល័យជំនាញចាត់ការបន្ត ៕ ឆ្លាម សមុទ្រ
