ភ្នំពេញ ៖ វាជារឿងដែលគួរឲ្យសាហាវខ្លាំងណាស់ បន្ទាប់ពីថៅកែជនជាតិចិន បានចាប់កម្មករខ្មែរម្នាក់ ដោយយកខ្សែភ្លើងរុំព័ទ្ធជុំវិញខ្លួនចងផ្អោបទៅនឹងបង្គោលភ្លើង នៅក្នុងទីលានទាត់បាល់ បង្កការភ្ញាក់ផ្អើលដល់ប្រជាពលរដ្ឋនាំគ្នារោមមើលគួរឲ្យសង្វេគ គ្រាន់តែរឿងលួចខ្សែរភ្លើងបន្តិចបន្តួចសោះ ។
ហេតុការណ៍ភ្ញាក់ផ្អើលខាងលើនេះ បានកើតឡើងកាលពីវេលាម៉ោង១រសៀលថ្ងែព្រហស្បតិ៍ ១១រោច ខែមិគសិរ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៤ ខែធ្នូ ឆ្នាំ២០១៧ នៅចំណុចការដ្ឋានសង់ខុនដូមជ្ឍមណ្ឌលព្រីមស៍ផ្លាហ្សា តាមបណ្តោយផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៍មានពីសមត្ថកិច្ចប៉ុស្តិ៍ទន្លេបាសាក់ បានឲ្យដឹងថា បុរសដែលថៅកែចោទថា ជាចោរលួចខ្សែភ្លើងនោះ ឈ្មោះហោ សុភី អាយុ៣០ឆ្នាំ ជាកម្មករការដ្ឋានសង់ខុនដូមជ្ឈមណ្ឌលព្រីមស៍ផ្លាហ្សា ស្នាក់នៅទីតាំងកើតហេតុខាងលើ ។
បើយោងតាមប្រភពពីអ្នកនៅកន្លែងកើតហេតុ បានឲ្យដឹងដែរថា បុរសដែលត្រូវគេចាប់ចងខាងលើជាកម្មករសំណង់នៅការដ្ឋានសង់ខុនដូមជ្ឍមណ្ឌលព្រីមស៍ផ្លាហ្សា ដោយសារតែគាត់បានធ្វើសកម្មភាពលួចខ្សែភ្លើងនៅក្នុងការដ្ឋានសំណង់របស់ខុនដូនេះ ក៏ត្រូវសន្តិសុខចាប់ខ្លួនប្រគល់ឲ្យថៅកែចិន និងយកមកចងទុកនៅកន្លែងខាងលើតែម្តង ហើយកន្លងមក ក្នុងការដ្ឋាន តែងតែត្រូវបានចោរលួចខ្សែរភ្លើង និងសម្ភារផ្សេងៗទៀតអស់ជាច្រើន ទើបចាប់ខ្លួនបុរសជាជនសង្ស័យបាននៅថ្ងៃនេះ ក៏ធ្វើសកម្មភាពព្រៃផ្សៃបែបនេះតែម្តង ។
ក្រោយកើតហេតុ បុរសជាជនសង្ស័យ ត្រូវបានថៅកែចិនឲ្យដោះលែងវិញ ដោយមិនប្តឹងសមត្ថកិច្ចឲ្យចាប់ខ្លួនអ្វីនោះទេ ៕ស រស្មី
សារព័ត៌មាន នគរវត្ត តែងតែនាំមុខគេជានិច្ច
