សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរស២នាក់ជិះម៉ូតូដេញតាមក្មេងទំនើង ហើយត្រូវបានបក្ខពួកក្មេងទំនើងយកដំបងដែកវាយរួចធ្លាក់ម៉ូតូផ្តួលបោកនឹងរ៉ឺម៉កកង់បីបណ្តាលឲ្យរងរបួសធ្ងន់ម្នាក់ស្រាលម្នាក់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ។
ហេតុការណ៍នេះបានកើតឡើង កាលពីវេលាម៉ោងរំលងអធ្រាត្រ ឈានចូលថ្ងៃព្រហស្បតិ៍ ៣រោច ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៤ ខែមករា ឆ្នាំ២០១៨ នៅជិតក្លឹប Spider តាមបណ្ដោយផ្លូវវេងស្រេង សង្កាត់ចោមចៅទី១ ខណ្ឌពោធិ៍សែនជ័យ ។
តាមសម្តីបុរសម្នាក់បានឲ្យដឹងថា មុនពេលកើតហេតុ គាត់ និងមិត្តភក្រម្នាក់ទៀត ដែលរងរបួសធ្ងន់ជិះម៉ូតូ VIVA ពណ៌ក្រហម ពាក់ស្លាកលេខ ភ្នំពេញ 1GQ-7870 តាមផ្លូវបានប្រទះឃើញក្មេងទំនើងមួយក្រុមមានគ្នា៣នាក់ប្រដាប់ដោយដាវសាម៉ូរ៉ៃ ជិះម៉ូតូ២គ្រឿង ម៉ាកហុងដាឌ្រីម ពណ៌ខ្មៅ និងមួយគ្រឿងទៀតម៉ាកស៊ុយសូគីនិច មិនចាំស្លាកលេខដូចគ្នា នៅចំណុចមុខរោងកុនលុច្ស ក៏បានដេញតាមរហូតដល់ផ្លូវវេងស្រេង ជិតក្លឹប Spider ក៏ត្រូវបានក្មេងទំនើងជិះម៉ូតូមកជិត ហើយហូតដំបងដែកវាយទៅលើជនរងគ្រោះរួចធ្លាក់ បណ្ដាលឲ្យដួលម៉ូតូអូសបោកផ្ទប់នឹងរ៉ឺម៉កម៉ូតូដែលចតនៅចិញ្ចើមផ្លូវរងរបួសធ្ងន់បែកក្បាលសន្លប់ស្ដូកតែម្ដង ចំណែករូបគាត់មិនមានរងរបួសទេ ។
ភ្លាមៗនោះ កម្លាំងអាវុធហត្ថបានដេញតាមក្មេងទំនើងបន្តទៀតនិងស្ទាក់ចាប់ឃាត់ខ្លួនបាន២នាក់រួមទាំងម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពញ 1BF-8704 មុខសាលាបឋមសិក្សាគោកបញ្ចាន់ សង្កាត់ចោមចៅ ខណ្ឌពោធិ៍សែនជ័យ ។
បច្ចុប្បន្ន ជនសង្ស័យទាំង២នាក់នោះ ត្រូវបានកម្លាំងអាវុធហត្ថខណ្ឌដូនពេញនាំយកទៅកាន់មូលដ្ឋានកងរាជអាវុធហត្ថខណ្ឌដូនពេញ ដើម្បីសាកសួរបន្ត ៕ សុខាសែនជ័យ
