ដាក់កម្លាំងត្រួតពិនិត្យបទល្មើសឃាត់ខ្លួនក្មេង២ក្រុមរកឃើញដំបងដែក កាំបិត និងដាវ

ខេត្តពោធិ៍សាត់៖ កម្លាំងចម្រុះដាក់គោលដៅត្រួតពិនិត្យបទល្មើសបានឃាត់ខ្លួនក្មេងៗសង្ស័យចំនួន ២ក្រុម ក្នុងនោះកម្លាំងឆែកឆេឃើញល័ក្ខទុដំបងដែក,កាំបិតតាំងតោ និងដាវជាអាវុធផងដែរ ដើម្បីយកទៅសាកសួរនៅអធិការដ្ឋាននគរបាលស្រុកបាកាន។

ប្រតិបត្តិការខាងលើធ្វើឡើងនៅវេលាម៉ោង១០ និង១០នាទី យប់ ថ្ងៃពុធ ៩រោច ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១០ ខែមករា ឆ្នាំ២០១៨ ត្រង់ចំណុចភូមិស្នាយទោល ឃុំត្រពាំងជង ស្រុកបាកាន ខេត្តពោធិ៍សាត់។

ប្រភពព័ត៌មានពីកម្លាំងចុះប្រតិបត្តិការបានឲ្យដឹងថា ក្នុងកិច្ចប្រតិបត្តិការខាងលើកម្លាំងបានឃាត់ក្មេងៗជាជនសង្ស័យចំនួន ២ក្រុមមានគ្នាចំនួន ០៧នាក់ ក្រុមទី១មានគ្នាចំនួន ០៤នាក់ ទី១ ឈ្មោះ សូត្រ ប៊ុនធឿន ភេទប្រុស អាយុ ១៩ឆ្នាំ ជនជាតិខ្មែរ រស់នៅភូមិអារ៉ែន ឃុំស្នាមព្រះ ស្រុកបាកាន ទី២ ឈ្មោះ ណុប គង្គា ហៅប៊ី ភេទប្រុស អាយុ ១៨ឆ្នាំ ជនជាតិខ្មែរ រស់នៅភូមិក្រពើរោទ៍ ឃុំស្នាមព្រះ ស្រុកបាកាន ទី៣ ឈ្មោះ ងួន សែន ភេទប្រុស អាយុ ២២ឆ្នាំ ជនជាតិខ្មែរ រស់នៅភូមិក្រពើរោទ៍ ឃុំស្នាមព្រះ ស្រុកបាកាន និងទី៤ ឈ្មោះ ផល ផា ភេទប្រុស អាយុ ១៥ឆ្នាំ ជនជាតិខ្មែរ រស់នៅភូមិជើងភ្លើង ឃុំស្នាមព្រះ ស្រុកបាកាន ក្រុមអ្នកទាំង ០៤នាក់នេះកម្លាំងដកហូតនូវអាវុធដូចជា,ដែកសំប៉ែតចំនួន ០២កំណាត់,កាំបិតតាំងតោចំនួន ០១ និងម៉ូតូចំនួន ០១គ្រឿងម៉ាក ហុងដាឌ្រីម សេ១២៥ សេរីឆ្នាំ២០០៨ ពណ៏ខ្មៅ ពាក់ស្លាកលេខ ពោធិ៍សាត់ 1A 9360។

ប្រភពព័ត៌មានដដែលបន្តថា ក្រុមទី២មានគ្នាចំនួន ០៣នាក់ ទី១ ឈ្មោះ នឿន សុខឃា ភេទប្រុស អាយុ ២១ឆ្នាំ ជនជាតិខ្មែរ រស់នៅភូមិថ្មី ឃុំតាលោ ស្រុកបាកាន ទី២ ឈ្មោះ ម៉ែន ម៉ាញ ហៅឆៃ ភេទប្រុស អាយុ ២១ឆ្នាំ ជនជាតិខ្មែរ រស់នៅភូមិកោះស្វាយ ឃុំផ្ទះរុង ស្រុកភ្នំក្រវាញ ទី៣ ឈ្មោះ វឌ្ឍនៈ វិសិទ្ធិ ហៅចែភេទប្រុស អាយុ ២០ឆ្នាំ ជនជាតិខ្មែរ រស់នៅភូមិសំរោង ឃុំក្បាលត្រាច ស្រុកក្រគរ ខេត្តពោធិ៍សាត់ ដកហូតបានដាវចំនួន ០១ ម៉ូតូចំនួន ០១គ្រឿងម៉ាក MSX ពាក់ស្លាកលេខ ពោធិ៍សាត់ 1G 8245។

ប្រភពព័ត៌មានដដែលបន្តទៀតថា ចំពោះជនសង្ស័យទាំងចំនួន ២ក្រុមមានគ្នាចំនួន ០៧នាក់ រួមវត្ថុតាង និងសម្ភារបាននាំយកទៅបន្តនីតិវិធី នៅអធិការដ្ឋាននគរបាលស្រុកបាកាន ហើយបានធ្វើកិច្ចសន្យាលាយលាក់ជាអក្សត្រឹមត្រូវ និងមានការធានាពីអាណាព្យាបាលផងដែរ៕ ប៉ឹម ពិន