សារព័ត៌មាន នគរវត្ត តែងតែនាំមុខគេជានិច្ច
ប៉ោយប៉ែត៖ ឆ្លងចរន្តអគ្គិសនីឆេះឃ្លាំងអេតចាយធ្វើឲ្យ ស្ត្រីម្នាក់បានឆក់ស្លាប់ពេលផ្ទៃមេឃកំពុងធ្លាក់ភ្លៀងស្រិចៗ នៅក្នុងឃ្លាំងលក់ទិញអេតចាយទំហំ២០ម៉ែត្រ គុណ២៥ម៉ែត្រ កាលពីថ្ងៃអង្គារ ១៤កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៣០ ខែកមរា ឆ្នាំ២០១៨ ឋិតក្នុងភូមិភ្នំតូចជើង ឃុំភ្នំតូច ស្រុកមង្គលបូរី ខេត្តបន្ទាយមានជ័យ ។
លោក អធិការនគរបាលស្រុកមង្គលបូរី ស៊ីន ណារ៉ាក់ ប្រាប់ថា ជនរងគ្រោះដែលស្លាប់ឈ្មោះ ធូ តាំងហូវ ហៅតាំង ភេទស្រី អាយុ៤៧ឆ្នាំ ជាស្ត្រីមេម៉ាយមានកូនប្រុសស្រីចំនួន៣នាក់ រស់នៅភូមិកេីតហេតុ។
លោកបញ្ជាក់ថា មុនពេលកើតហេតុជនរងគ្រោះបានដេកនៅក្នុងបន្ទប់ម្នាក់ឯង ក៏ស្រាប់តែឃើញមានផ្សែងហុយបង្កជាអណ្តាតភ្លេីងចេញពីក្នុងបន្ទប់ ចំណែកកូនៗទៅរៀនអស់ ។
នៅពេលកើតមានគ្រោះអគ្គិភ័យនេះដែរ មានរថយន្តពន្លត់អគ្គិភ័យរបស់ស្នងការដ្ឋាន ចំនួន៣គ្រឿង រួមទាំងកម្លាំងនគរបាលស្រុកមង្គលបូរី និងប្រជាពលរដ្ឋនៅក្បែរខាងជួយអន្តរាគមន៍បាញ់ទឹកពន្លត់ ទើបរលត់អស់ទាំងស្រុង មិនរាលដាលឆេះសម្ភារក្នុងឃ្លាំងនោះបន្តទៀតឡើយ ។
ចំពោះសម្ភារដែលខូចខាតមានម៉ាស៊ីនត្រជាក់១គ្រឿង, គ្រែដេក១, ពួក១ និងភួយ។
តាមការពិនិត្យនៅលើដឹងខ្លួនសព ឃើញមានខ្សែភ្លើងព័ទ្ធលើខ្លួន ដូច្នេះបើតាមការសន្និដ្ឋានជំហ៊ានដំបូងរបស់សមត្ថកិច្ច សង្ស័យជនរងគ្រោះគាត់យកឌុយខ្សែភ្លើងមានទឹកទៅដោតនឹងព្រីភ្លើង បណ្ដាលឲ្យទុស្សេឆេះហើយឆក់ស្លាប់តែម្តង ។
ក្រោយពីពិនិត្យសមត្ថកិច្ចបានប្រគល់សពឲ្យសាច់ញាតិធ្វើយបុណ្យតាមប្រពៃណី ៕ វណ្ណា
